సంక్రాంతి అంటే గుర్తొచ్చే డైరెక్టర్లలో ఒకరు అనిల్ రావిపూడి. వరుసగా పండుగ సీజన్ను టార్గెట్ చేస్తూ బాక్సాఫీస్ వద్ద భారీ విజయాలు అందుకుంటూ “హిట్ మిషన్”గా పేరు తెచ్చుకున్నారు. గత ఏడాది సంక్రాంతికి విడుదలైన “సంక్రాంతికి వస్తున్నాం” సినిమాతో బ్లాక్బస్టర్ అందుకున్న ఆయన, ఈ ఏడాది “మన శంకర్ వరప్రసాద్ గారు” సినిమాతో మరోసారి సూపర్ డూపర్ సక్సెస్ను తన ఖాతాలో వేసుకున్నారు. దీంతో ఆయన తదుపరి సినిమాపై అంచనాలు మరింత పెరిగిపోయాయి.
ఇప్పటికే అనిల్ రావిపూడి తన నెక్స్ట్ ప్రాజెక్ట్ను విక్టరీ వెంకటేష్తో చేయబోతున్నట్లు ప్రకటించిన సంగతి తెలిసిందే. ఈ సినిమా ప్రత్యేకత ఏమిటంటే… వెంకటేష్తో పాటు కళ్యాణ్ రామ్ కూడా కీలక పాత్రలో కనిపించబోతున్నారు. దీంతో ఈ ప్రాజెక్ట్ మల్టీస్టారర్గా తెరకెక్కనుంది.
ఇంకా ఆసక్తికర విషయం ఏమిటంటే, ఈ సినిమాను 2027 సంక్రాంతి సందర్భంగా విడుదల చేయాలని ప్లాన్ చేస్తున్నారు. ప్రస్తుతం స్క్రిప్ట్ పనులు పూర్తయ్యాయని, జూన్ నెల నుంచి రెగ్యులర్ షూటింగ్ ప్రారంభం కానుందని సమాచారం. ఈ చిత్రాన్ని సురేష్ ప్రొడక్షన్స్, సైన్ స్క్రీన్ బ్యానర్లపై భారీ స్థాయిలో నిర్మిస్తున్నారు.
ఇక హీరోయిన్ల విషయంలో కూడా క్లారిటీ వస్తోంది. కళ్యాణ్ రామ్ సరసన కృతి శెట్టి నటించబోతున్నట్లు చాలా రోజులుగా వస్తున్న వార్తలను స్వయంగా అనిల్ రావిపూడి కన్ఫర్మ్ చేశారు. దీంతో ఈ జోడీపై ఆసక్తి పెరిగింది.
మరోవైపు వెంకటేష్ సరసన ఎవరు నటించబోతున్నారన్నది కూడా చర్చనీయాంశంగా మారింది. ఈ పాత్ర కోసం కీర్తి సురేష్ పేరు మొదటి నుంచే వినిపిస్తోంది. తాజా సమాచారం ప్రకారం, ఆమె దాదాపు ఫైనల్ అయ్యారని, త్వరలోనే అధికారిక ప్రకటన వచ్చే అవకాశముందని తెలుస్తోంది.
ఇటీవల కాలంలో తెలుగులో సినిమాలు తగ్గించిన కీర్తి సురేష్, చివరిసారిగా నాని నటించిన “దసరా” సినిమాలో కనిపించారు. ఇప్పుడు మళ్లీ అనిల్ రావిపూడి దర్శకత్వంలో ఈ ప్రాజెక్ట్తో రీ-ఎంట్రీ ఇవ్వబోతుండటం అభిమానుల్లో ఎగ్జైట్మెంట్ పెంచుతోంది.
మొత్తానికి సంక్రాంతి సీజన్లో మళ్లీ బాక్సాఫీస్ను టార్గెట్ చేస్తూ అనిల్ రావిపూడి ప్లాన్ చేసిన ఈ మల్టీస్టారర్ ప్రాజెక్ట్ ఎలాంటి సంచలనం సృష్టిస్తుందో చూడాలి!
