గత ఏడాది డిసెంబర్ 12న థియేటర్లలో విడుదలైన ‘ఈషా’ (Eesha) చిత్రం ప్రేక్షకులను విశేషంగా ఆకట్టుకుంది. తక్కువ బడ్జెట్తో రూపొందినప్పటికీ, ‘మసూద’ తరహాలోనే మంచి హారర్ ఎలిమెంట్స్ మరియు ఉత్కంఠభరితమైన కథనంతో ఈ సినిమా విమర్శకుల ప్రశంసలు అందుకుంది. థియేటర్ రన్ పూర్తి చేసుకున్న ఈ చిత్రం, ఇప్పుడు ప్రముఖ ఓటీటీ సంస్థ అమెజాన్ ప్రైమ్ వీడియో (Amazon Prime Video) లో స్ట్రీమింగ్ అవుతోంది.
శ్రీనివాస్ మన్నే దర్శకత్వం వహించిన ఈ సినిమాలో త్రిగుణ్, హెబ్బా పటేల్, అఖిల్ రాజ్, మరియు సిరి హనుమంతు ప్రధాన పాత్రలు పోషించారు. చిన్నప్పటి నుంచి కలిసి పెరిగిన నలుగురు స్నేహితులు దెయ్యాలు, ఆత్మలు లేవని బలంగా నమ్ముతుంటారు. ఈ క్రమంలో దెయ్యాల పేరుతో ప్రజలను మోసం చేసే నకిలీ స్వామీజీల గుట్టు రట్టు చేయడమే వారి పనిగా పెట్టుకుంటారు. అలా ఆదిదేవ్ అనే ఒక స్వామీజీని పట్టుకోవాలని వారు చేసిన ప్రయత్నం ఎలాంటి మలుపులు తిరిగిందనేదే ఈ సినిమా ప్రధాన ఇతివృత్తం.
ఆంధ్ర – ఒడిశా సరిహద్దు ప్రాంతాలకు వెళ్లిన ఆ నలుగురు స్నేహితులకు అక్కడ ఎదురైన భయానక పరిస్థితులు, వారు చూసిన వింత సంఘటనలు ప్రేక్షకులకు వెన్నులో వణుకు పుట్టిస్తాయి. కేవలం హారర్ మాత్రమే కాకుండా, స్నేహం మరియు నమ్మకాల చుట్టూ తిరిగే ఈ కథనం ఓటీటీ ఆడియన్స్ను కూడా బాగా ఆకట్టుకుంటోంది. థియేటర్లో ఈ సినిమాను మిస్ అయిన వారు ఇప్పుడు హ్యాపీగా తమ ఇంట్లోనే కూర్చుని ఈ హారర్ థ్రిల్లర్ను ఎంజాయ్ చేయవచ్చు.
