నేచురల్ స్టార్ నాని, దర్శకుడు శ్రీకాంత్ ఓదెల కాంబినేషన్లో తెరకెక్కుతున్న భారీ పీరియడ్ యాక్షన్ డ్రామా ‘ది పారడైజ్’పై ప్రేక్షకుల్లో రోజురోజుకూ అంచనాలు పెరుగుతున్నాయి. ‘దసరా’ వంటి బ్లాక్బస్టర్ తర్వాత ఈ ఇద్దరూ మరోసారి కలిసి పనిచేస్తుండటంతో ఈ ప్రాజెక్ట్ టాలీవుడ్లో హాట్ టాపిక్గా మారింది. అయితే ఇప్పుడు ఈ సినిమాకు సంబంధించి ఒక కీలక వార్త ఇండస్ట్రీ వర్గాల్లో చర్చనీయాంశంగా మారింది.
మొదట ప్రకటించిన షెడ్యూల్ ప్రకారం ‘ది పారడైజ్’ను 2026 ఆగస్టు 21న విడుదల చేయాలని మేకర్స్ ప్లాన్ చేశారు. కానీ తాజా సమాచారం ప్రకారం ఈ రిలీజ్ డేట్ మారే అవకాశాలు కనిపిస్తున్నాయి. ఇందుకు ప్రధాన కారణంగా సినిమా షూటింగ్ ఇంకా పూర్తికాకపోవడమేనని తెలుస్తోంది.
ఇండస్ట్రీ వర్గాల సమాచారం ప్రకారం, చిత్రానికి సంబంధించిన భారీ భాగం షూటింగ్ ఇంకా మిగిలి ఉందట. అంతేకాకుండా గత కొన్ని వారాలుగా చిత్రబృందం నుంచి ఎలాంటి అధికారిక అప్డేట్ లేకపోవడం కూడా ఈ వార్తలకు మరింత బలం చేకూరుస్తోంది. దీంతో ‘ది పారడైజ్’ మరోసారి వాయిదా పడుతుందా అనే చర్చలు మొదలయ్యాయి.
మరోవైపు మాస్ మహారాజా రవితేజ నటిస్తున్న ‘ఇరుముడి’ చిత్రాన్ని కూడా అదే తేదీ అయిన ఆగస్టు 21న విడుదల చేస్తున్నట్లు మేకర్స్ ప్రకటించారు. రెండు భారీ సినిమాలు ఒకే రోజున విడుదలైతే థియేటర్ల పంపిణీ విషయంలో ఇబ్బందులు తలెత్తే అవకాశం ఉండటంతో, నాని సినిమా విడుదలను మరో తేదీకి మార్చే ఆలోచనలో నిర్మాతలు ఉన్నారనే టాక్ వినిపిస్తోంది. అయితే దీనిపై అధికారిక ప్రకటన మాత్రం ఇంకా రావాల్సి ఉంది.
ఇక ‘ది పారడైజ్’లో నాని తన కెరీర్లోనే అత్యంత డిఫరెంట్ లుక్లో కనిపించనున్నాడు. పొడవాటి జుట్టు, జడలు, గడ్డంతో పూర్తి మాస్ అవతారంలో దర్శనమివ్వనున్న నాని, సమాజంలోని వెనుకబడిన వర్గాల కోసం పోరాడే శక్తివంతమైన నాయకుడి పాత్రలో నటిస్తున్నట్లు సమాచారం. సికింద్రాబాద్ బస్తీల నేపథ్యంతో ఈ కథ సాగనుంది.
ఈ చిత్రంలో కాయాదు లోహర్ హీరోయిన్గా నటిస్తుండగా, మోహన్ బాబు ‘శికంజా మాలిక్’ అనే భయంకరమైన విలన్ పాత్రలో కనిపించనున్నారు. అలాగే బాలీవుడ్ నటుడు రాఘవ్ జుయాల్ టాలీవుడ్లోకి ఈ సినిమాతో ఎంట్రీ ఇస్తున్నారు. సొనాలి కుల్కర్ణి, తనికెళ్ల భరణి, సంపూర్ణేష్ బాబు తదితరులు కీలక పాత్రలు పోషిస్తున్నారు.
సంగీత బాధ్యతలను అనిరుధ్ రవిచందర్ నిర్వహిస్తున్నారు. ఇప్పటికే విడుదలైన ‘ఆయా షేర్’ సాంగ్ సోషల్ మీడియాలో మంచి స్పందనను సొంతం చేసుకుంది. నాని కెరీర్లోనే అత్యంత భారీ బడ్జెట్తో, రూ.160 కోట్లకు పైగా వ్యయంతో ఈ చిత్రాన్ని ఎస్ఎల్వి సినిమాస్ నిర్మిస్తోంది.
ఇప్పటికే పలుమార్లు వాయిదా పడిన ఈ సినిమా రిలీజ్ డేట్ మరోసారి మారుతుందా? లేక అనుకున్న సమయానికే ప్రేక్షకుల ముందుకు వస్తుందా? అన్నది ఇప్పుడు ఆసక్తికరంగా మారింది. దీనిపై త్వరలోనే అధికారిక ప్రకటన వచ్చే అవకాశాలు ఉన్నాయని సినీ వర్గాలు చెబుతున్నాయి.
