మెగాస్టార్ చిరంజీవికి ఇటీవల చిన్న శస్త్రచికిత్స జరిగిందంటూ సోషల్ మీడియాలో వస్తున్న వార్తలను ‘మన శంకర వరప్రసాద్ గారు’ చిత్ర నిర్మాతలు సాహు గారపాటి, సుస్మిత కొణిదెల తీవ్రంగా ఖండించారు. ఈ వార్తల్లో ఎలాంటి నిజం లేదని, అభిమానులు ఆందోళన చెందాల్సిన అవసరం లేదని వారు స్పష్టం చేశారు. చిరంజీవి మోకాలి నొప్పితో బాధపడుతున్నారని, అందుకే సర్జరీ జరిగిందని గత కొన్ని రోజులుగా జరుగుతున్న ప్రచారానికి ఈ వివరణతో చెక్ పడింది.
నిర్మాత సాహు గారపాటి మీడియాతో మాట్లాడుతూ.. చిరంజీవి ప్రస్తుతం గతంలో కంటే మరింత ఫిట్గా ఉన్నారని, ఈ చిత్ర షూటింగ్ సమయంలో కూడా ఆయన క్రమం తప్పకుండా జిమ్ చేసేవారని వెల్లడించారు. జనవరి 12న సంక్రాంతి కానుకగా సినిమా విడుదల కానున్న నేపథ్యంలో, చిరంజీవి ప్రస్తుతం పోస్ట్ ప్రొడక్షన్ పనులు మరియు ప్రమోషన్లలో బిజీగా ఉన్నారని తెలిపారు. బుధవారం జరగబోయే చిత్ర ప్రీ-రిలీజ్ ఈవెంట్కు మెగాస్టార్తో పాటు విక్టరీ వెంకటేష్ కూడా హాజరవుతారని ఆయన ధృవీకరించారు.
అనిల్ రావిపూడి దర్శకత్వంలో తెరకెక్కిన ఈ చిత్రంలో చిరంజీవి సరసన నయనతార హీరోయిన్గా నటిస్తోంది. షైన్ స్క్రీన్స్ మరియు గోల్డ్ బాక్స్ ఎంటర్టైన్మెంట్స్ సంయుక్తంగా నిర్మిస్తున్న ఈ సినిమాకు భీమ్స్ సిసిరోలియో సంగీతం అందించారు. ఈ చిత్రంలో చిరంజీవిని సరికొత్త మాస్ లుక్లో చూడబోతున్నామని, సంక్రాంతికి మెగా అభిమానులకు అసలైన విందు భోజనంలా ఈ చిత్రం ఉంటుందని చిత్ర యూనిట్ ధీమా వ్యక్తం చేసింది.
