లోకనాయకుడు కమల్ హాసన్, స్టార్ డైరెక్టర్ శంకర్ కాంబినేషన్‌లో తెరకెక్కుతున్న ‘ఇండియన్ 3’పై మరో కీలక అప్‌డేట్ వచ్చింది. తాజాగా ఈ సినిమాకు సంబంధించిన కొత్త పోస్టర్‌ను మేకర్స్ విడుదల చేయడంతో అభిమానుల్లో ఆసక్తి మరింత పెరిగింది.
లైకా ప్రొడక్షన్స్ సోషల్ మీడియాలో ఈ పోస్టర్‌ను షేర్ చేస్తూ.. “సేనాపతి జీరో టాలరెన్స్‌తో తిరిగి వస్తున్నారు” అంటూ క్యాప్షన్ ఇచ్చింది. ప్రస్తుతం ‘ఇండియన్ 3’ పోస్ట్ ప్రొడక్షన్ పనులు వేగంగా జరుగుతున్నట్లు చిత్రబృందం వెల్లడించింది.
ఇక ‘ఇండియన్ 2’ షూటింగ్ సమయంలోనే ‘ఇండియన్ 3’కు సంబంధించిన కీలక సన్నివేశాలను కూడా చిత్రీకరించారు. భారీ నిడివి కారణంగా కథను రెండు భాగాలుగా విడుదల చేయాలని శంకర్ నిర్ణయించారు. అంతేకాదు.. ‘ఇండియన్ 2’ కంటే ‘ఇండియన్ 3’పైనే తనకు ఎక్కువ ఆసక్తి ఉందని కమల్ హాసన్ గతంలో చెప్పడం కూడా సినిమాపై అంచనాలను పెంచింది.
1996లో వచ్చిన ‘ఇండియన్’ ఘన విజయం సాధించిన తర్వాత చాలా ఏళ్లకు సీక్వెల్‌గా ‘ఇండియన్ 2’ తెరకెక్కింది. అయితే ఈ సినిమా ప్రయాణంలో పలు ఆటంకాలు ఎదురయ్యాయి. షూటింగ్ సమయంలో జరిగిన ప్రమాదం, కరోనా మహమ్మారి, నిర్మాణానికి సంబంధించిన వివాదాల కారణంగా సినిమా ఆలస్యమైంది. చివరకు సమస్యలు పరిష్కారం కావడంతో షూటింగ్ పూర్తయి ‘ఇండియన్ 2’ ప్రేక్షకుల ముందుకు వచ్చింది.
ఇప్పుడు ‘ఇండియన్ 3’ కొత్త పోస్టర్ రావడంతో సేనాపతి అభిమానుల్లో మళ్లీ జోష్ మొదలైంది. అవినీతిపై సేనాపతి చేసే పోరాటం ఈసారి ఎలా ఉండబోతుందో తెలుసుకోవడానికి ప్రేక్షకులు ఆసక్తిగా ఎదురుచూస్తున్నారు.
