ఇటీవల కాలంలో ప్రేక్షకుల్లో ఆసక్తిని రేకెత్తించిన సినిమాల్లో ‘హనుమాన్ అంశ్’ ఒకటిగా నిలిచింది. ఈ సినిమా గురించి సోషల్ మీడియాలో, సినీ వర్గాల్లో పెద్ద ఎత్తున చర్చ జరిగింది. ముఖ్యంగా కేవలం రూ.2 కోట్ల బడ్జెట్‌తో తెరకెక్కిన ఈ సినిమా రూ.400 కోట్లకు పైగా వసూళ్లు సాధించిందనే ప్రచారం సినిమాపై మరింత ఆసక్తిని పెంచింది.
దర్శకుడు విశాల్ చతుర్వేది నిర్మాతగా కూడా వ్యవహరించిన ఈ సినిమా ఆధ్యాత్మిక గురువు నీమ్ కరోలీ బాబా జీవిత కథ ఆధారంగా తెరకెక్కింది. ఉత్తరప్రదేశ్‌కు చెందిన నీమ్ కరోలీ బాబా చిన్న వయసులోనే ఆధ్యాత్మిక మార్గంలోకి అడుగుపెట్టి, తన జీవితంలో ఎన్నో అద్భుతాలు చేశారని ఆయనను నమ్మేవారు చెబుతారు. ఆయన హనుమంతుడిని ఎంతో భక్తితో ఆరాధించేవారు. అందుకే ఆయనను చాలామంది హనుమంతుడి అంశావతారంగా భావించేవారు.
సత్యం, ధర్మం, ప్రేమ అనే మూడు అంశాలను నీమ్ కరోలీ బాబా తన బోధనల్లో ప్రధానంగా ప్రస్తావించేవారని చెబుతారు. ఆయన జీవితంలోని ఆధ్యాత్మిక కోణాలను, ఆయనను నమ్మిన భక్తుల అనుభవాలను ఆధారంగా చేసుకుని ‘హనుమాన్ అంశ్’ చిత్రాన్ని రూపొందించినట్లు తెలుస్తోంది.
ఇక ఈ సినిమా విడుదలైన ప్రాంతాల్లో మంచి వసూళ్లు సాధించిందనే వార్తలు వైరల్‌గా మారాయి. ముఖ్యంగా తక్కువ బడ్జెట్‌తో తెరకెక్కి భారీ వసూళ్లు సాధించిన చిత్రంగా ఇది చర్చలో నిలిచింది. దీంతో దక్షిణాది ప్రేక్షకుల్లో కూడా ఈ సినిమాపై ఆసక్తి పెరిగింది.
ఇప్పటివరకు నీమ్ కరోలీ బాబా గురించి దక్షిణాది ప్రేక్షకుల్లో పెద్దగా అవగాహన లేకపోయినా, ‘హనుమాన్ అంశ్’ సినిమా కారణంగా ఆయన గురించి తెలుసుకునేందుకు చాలామంది ఆసక్తి చూపుతున్నారని చిత్రబృందం చెబుతోంది.
ఈ నేపథ్యంలో ‘హనుమాన్ అంశ్’ చిత్రాన్ని ఈ నెల 9న తెలుగు, తమిళ, మలయాళ, కన్నడ భాషల్లో విడుదల చేయడానికి సిద్ధం చేస్తున్నారు. ఉత్తరాదిలో మంచి స్పందనను అందుకున్న ఈ సినిమా దక్షిణాదిలో ఎలాంటి ఆదరణను సొంతం చేసుకుంటుందో ఇప్పుడు ఆసక్తికరంగా మారింది.
