ఆగస్ట్ 7న థియేటర్లలోకి ‘కొరియన్ కనకరాజు’.. విడుదల తేదీ ప్రకటించిన చిత్రబృందం
మెగా ప్రిన్స్ వరుణ్ తేజ్ కథానాయకుడిగా, దర్శకుడు మేర్లపాక గాంధీ రూపొందిస్తున్న హారర్ కామెడీ చిత్రం ‘కొరియన్ కనకరాజు’ విడుదల తేదీ ఖరారైంది. ఈ చిత్రాన్ని 2026 ఆగస్ట్ 7న ప్రపంచవ్యాప్తంగా థియేటర్లలో విడుదల చేయనున్నట్లు చిత్రబృందం అధికారికంగా ప్రకటించింది. ఈ సందర్భంగా వరుణ్ తేజ్ తన ఎక్స్ ఖాతాలో కొత్త పోస్టర్ను విడుదల చేస్తూ, “2026 ఆగస్ట్ 7… ఎంటర్టైన్మెంట్ గ్యారెంటీ” అంటూ అభిమానుల్లో మరింత ఆసక్తిని పెంచారు.
భారీ నిర్మాణ వ్యయంతో తెరకెక్కుతున్న ఈ సినిమా భారత్–కొరియా నేపథ్యంలోని వినూత్న కథతో రూపొందుతోంది. హారర్, కామెడీ అంశాలను మేళవించిన ఈ చిత్రంలో వరుణ్ తేజ్ ఇప్పటివరకు చేయని విభిన్నమైన పాత్రలో కనిపించనున్నారని చిత్ర వర్గాలు చెబుతున్నాయి.
ఇప్పటికే కొరియాలో జరిగిన చివరి షెడ్యూల్ విజయవంతంగా పూర్తైంది. ఇందులో వరుణ్ తేజ్, రితికా నాయక్, సత్యలపై కీలక సన్నివేశాలతో పాటు ఓ పాటను చిత్రీకరించారు. ఏప్రిల్లో విడుదలైన ‘కమ్సహమ్నిదా’ పాట ప్రేక్షకుల నుంచి మంచి స్పందనను అందుకుంది.
వరుణ్ తేజ్ పుట్టినరోజు సందర్భంగా విడుదలైన టైటిల్ గ్లింప్స్ సినిమాపై అంచనాలను మరింత పెంచింది. గ్లింప్స్ ప్రకారం, కనకరాజు అనే వ్యక్తి కోసం వెతుకుతున్న కొరియన్ పోలీసులు ఓ భారతీయ ఫొటోగ్రాఫర్ను విచారిస్తుంటారు. అదే సమయంలో పౌర్ణమి రాత్రి ఆత్మ ఆవహించిన కనకరాజు పోలీస్ స్టేషన్లోకి ప్రవేశించి సమురాయ్ కత్తితో పోలీసులపై విరుచుకుపడతాడు. ఈ ఘటనను చూసిన ఫొటోగ్రాఫర్ “ఈ కనకరాజు… మన కనకరాజు కాదు!” అని చెప్పడంతో కథలోని అసలు మిస్టరీపై ప్రేక్షకుల్లో ఆసక్తి పెరిగింది.
ఈ చిత్రానికి ఎస్. తమన్ సంగీతం అందిస్తుండగా, మనోజ్ రెడ్డి కాటసాని సినిమాటోగ్రఫీ, సత్య జి ఎడిటింగ్ బాధ్యతలు నిర్వహిస్తున్నారు. హారర్, కామెడీ, యాక్షన్ అంశాల సమ్మేళనంగా తెరకెక్కుతున్న ‘కొరియన్ కనకరాజు’ వచ్చే ఏడాది ప్రేక్షకులను అలరించేందుకు సిద్ధమవుతోంది.
