మెగా పవర్ స్టార్ రామ్ చరణ్ సినిమాలకు అభిమానులు చేసే సెలబ్రేషన్స్ ఎప్పుడూ ప్రత్యేకంగా ఉంటాయి. కానీ తాజాగా విజయవాడలో జరిగిన ఒక వేడుక మాత్రం అందరి దృష్టిని ఆకర్షిస్తోంది. సాధారణంగా హీరోల కోసం భారీ కటౌట్లు ఏర్పాటు చేసే ఫ్యాన్స్, ఈసారి దర్శకుడు బుచ్చిబాబు సనాకు కూడా ప్రత్యేక కటౌట్ ఏర్పాటు చేసి సోషల్ మీడియాలో వైరల్ అయ్యారు.
ఈ కార్యక్రమంలో ప్రధాన ఆకర్షణగా నిలిచింది బుచ్చిబాబు సనా కటౌట్. సాధారణంగా సింపుల్గా కనిపించే దర్శకుడిని అభిమానులు పూర్తిగా మాస్ అవతారంలో చూపించారు. బాడీబిల్డర్ స్టైల్లో, కండలు తిరిగిన శరీరంతో, పహెల్వాన్ లుక్లో డిజైన్ చేసిన ఈ కటౌట్ చూసినవారిని ఆశ్చర్యపరిచింది. రామ్ చరణ్తో ఆయన తెరకెక్కిస్తున్న సినిమా మాస్ ఎలిమెంట్స్ను ప్రతిబింబించేలా ఈ డిజైన్ను రూపొందించినట్లు తెలుస్తోంది.
విజయవాడ “టీమ్ ఆర్సీ” ఆధ్వర్యంలో జరిగిన ఈ వేడుకలో భారీ సంఖ్యలో అభిమానులు పాల్గొన్నారు. థియేటర్ పరిసరాలు మెగా అభిమానుల సందడితో మార్మోగిపోయాయి. రామ్ చరణ్ ఫోటోలతో ఉన్న జెండాలు ఊపుతూ, బుచ్చిబాబు కటౌట్తో సెల్ఫీలు, వీడియోలు తీసుకుంటూ అభిమానులు సందడి చేశారు.
ప్రస్తుతం ఈ కటౌట్కు సంబంధించిన ఫోటోలు, వీడియోలు సోషల్ మీడియాలో వైరల్గా మారాయి. హీరోలకు మాత్రమే కాదు, తమ అభిమాన దర్శకులకు కూడా ఇదే స్థాయిలో గౌరవం ఇవ్వగలమని మెగా అభిమానులు మరోసారి నిరూపించారు. రామ్ చరణ్ – బుచ్చిబాబు సనా కాంబినేషన్పై ఉన్న భారీ అంచనాలకు ఈ వినూత్న సెలబ్రేషన్ నిదర్శనంగా నిలిచింది.
