నందమూరి అభిమానుల్లో భారీ హైప్ క్రియేట్ చేస్తున్న ప్రాజెక్ట్లలో ‘NBK111’ టాప్లో నిలుస్తోంది. బాలయ్య బాబు హీరోగా, మాస్ డైరెక్టర్ గోపీచంద్ మలినేని తెరకెక్కిస్తున్న ఈ క్రేజీ ప్రాజెక్ట్కు సంబంధించి తాజాగా వచ్చిన అప్డేట్ సోషల్ మీడియాలో వైరల్ అవుతోంది. ఈ సినిమాలో నటుడు మంచు మనోజ్ కీలక పాత్రలో నటిస్తున్నట్లు మేకర్స్ అధికారికంగా ప్రకటించారు. అయితే ఆయన పాత్ర విలన్ షేడ్లో ఉండబోతుందనే టాక్ ఇప్పుడు ఇండస్ట్రీ వర్గాల్లో హాట్ టాపిక్గా మారింది.
ఈ అప్డేట్ను షేర్ చేసిన దర్శకుడు గోపీచంద్ మలినేని.. సినిమాలో మనోజ్ పాత్ర చాలా పవర్ఫుల్గా, స్టోరీకి కీలకంగా ఉండబోతుందని చెప్పడంతో అభిమానుల్లో అంచనాలు మరింత పెరిగిపోయాయి. గతంలో ‘ఊ కొడతారా? ఉలిక్కి పడతారా?’ సినిమాలో కలిసి కనిపించిన బాలకృష్ణ, మంచు మనోజ్.. ఇప్పుడు మరోసారి స్క్రీన్ షేర్ చేసుకోనుండటం ప్రత్యేక ఆకర్షణగా మారింది.
ఇక ‘NBK111’ చారిత్రాత్మక బ్యాక్డ్రాప్లో తెరకెక్కుతోందని సమాచారం. ఈ సినిమాలో బాలకృష్ణ ద్విపాత్రాభినయం చేయనున్నారనే వార్తలు ఇప్పటికే భారీ హైప్ తీసుకొచ్చాయి. పైగా ‘వీరసింహారెడ్డి’ లాంటి బ్లాక్బస్టర్ తర్వాత బాలయ్య – గోపీచంద్ మలినేని కాంబోలో వస్తున్న రెండో సినిమా కావడంతో అభిమానులు ఈ ప్రాజెక్ట్పై భారీ అంచనాలు పెట్టుకున్నారు.
మరోవైపు ఈ చిత్రంలో కథానాయికగా నయనతార నటిస్తోంది. బాలకృష్ణ – నయనతార కాంబినేషన్లో వచ్చిన ‘సింహా’, ‘శ్రీరామరాజ్యం’, ‘జై సింహా’ సినిమాలు మంచి విజయాలు సాధించడంతో, ఇప్పుడు వీరిద్దరి కాంబోలో రాబోతున్న నాలుగో సినిమాపై కూడా ప్రత్యేక ఆసక్తి నెలకొంది.
ఇక సంగీత బాధ్యతలను థమన్ తీసుకున్నారు. బాలకృష్ణ సినిమాకు థమన్ సంగీతం అందించడం ఇది ఆరోసారి కావడంతో, మాస్ బీట్స్ ఎలా ఉండబోతాయోనని అభిమానులు ఇప్పటినుంచే ఎగ్జైటింగ్గా ఎదురుచూస్తున్నారు. మొత్తానికి పవర్ఫుల్ కాస్టింగ్, భారీ బ్యాక్డ్రాప్, బ్లాక్బస్టర్ కాంబినేషన్లతో ‘NBK111’పై రోజురోజుకీ అంచనాలు పెరుగుతూనే ఉన్నాయి.
