యంగ్ హీరో సిద్ధు జొన్నలగడ్డ తన కెరీర్‌లో మరో కీలకమైన ప్రాజెక్ట్‌కు సిద్ధమవుతున్నాడు. గత సినిమాలు ఆశించిన స్థాయిలో బాక్సాఫీస్ విజయాన్ని అందుకోకపోయినా, ఏమాత్రం వెనక్కి తగ్గకుండా వరుస ప్రాజెక్టులను లైనప్ చేస్తున్నాడు. ఈ క్రమంలోనే తన కెరీర్‌లో 10వ సినిమాను ప్రకటించి అందరి దృష్టిని ఆకర్షించాడు. ఈ ప్రాజెక్ట్‌ను సుకుమార్ రైటింగ్స్, గీతా ఆర్ట్స్ 2 బ్యానర్లపై నిర్మించబోతుండటంతో ఒక్కసారిగా అంచనాలు పెరిగిపోయాయి.
ఇప్పటికే ఈ సినిమాకు సంబంధించిన అధికారిక పోస్టర్‌ను మేకర్స్ విడుదల చేశారు. పోస్టర్‌లో ఒకవైపు భారీ కత్తి, మరోవైపు శివలింగం కనిపించడం ఆసక్తిని పెంచుతోంది. అంతేకాదు, పోస్టర్‌కు ఇచ్చిన డార్క్ లుక్ చూస్తుంటే ఈసారి సిద్ధు ఏదో డిఫరెంట్ కాన్సెప్ట్‌తో ప్రేక్షకుల ముందుకు రాబోతున్నాడనే ఆసక్తి కలుగుతోంది.
ఇక సిద్ధు జొన్నలగడ్డ కెరీర్ విషయానికి వస్తే.. మొదట్లో ‘జోష్’, ‘ఆరెంజ్’ వంటి సినిమాల్లో చిన్న పాత్రల్లో కనిపించాడు. ఆ తర్వాత ‘గుంటూరు టాకీస్’, ‘కృష్ణ అండ్ హిజ్ లీల’ వంటి సినిమాలతో హీరోగా గుర్తింపు తెచ్చుకున్నాడు. అయితే ‘డీజే టిల్లు’ సినిమా మాత్రం సిద్ధు కెరీర్‌ను పూర్తిగా మార్చేసింది. తన కామెడీ టైమింగ్, డైలాగ్ డెలివరీతో యూత్‌లో మంచి క్రేజ్ సంపాదించుకున్నాడు.
కానీ ఆ తర్వాత వచ్చిన ‘జాక్’ సినిమా బాక్సాఫీస్ వద్ద ఆశించిన ఫలితాన్ని అందుకోలేకపోయింది. ఇక నీరజ కోన దర్శకత్వంలో వచ్చిన ‘తెలుసు కదా’ సినిమాకు మంచి స్పందన వచ్చినప్పటికీ, వసూళ్ల పరంగా మాత్రం అనుకున్న స్థాయిలో విజయాన్ని అందుకోలేకపోయింది.
ఇలాంటి పరిస్థితుల్లో ఇప్పుడు సిద్ధు తన పదో సినిమాను ఏకంగా సుకుమార్ రైటింగ్స్, గీతా ఆర్ట్స్ 2 వంటి ప్రముఖ నిర్మాణ సంస్థలతో చేయబోతుండటం ఆసక్తికరంగా మారింది. ‘#Siddu10’ అనే వర్కింగ్ టైటిల్‌తో ప్రకటించిన ఈ సినిమా ప్రారంభోత్సవం నవంబర్ 11, 2026న ఉదయం 9 గంటల 32 నిమిషాలకు జరగనున్నట్లు సమాచారం.
అయితే ఈ సినిమాకు దర్శకత్వం వహించబోయేది ఎవరు? హీరోయిన్‌గా ఎవరిని ఎంపిక చేయబోతున్నారు? పోస్టర్‌లో కనిపించిన కత్తి, శివలింగం వెనుక ఉన్న కథేంటి? అనే విషయాలపై ఇంకా ఆసక్తి నెలకొంది. మరి ఈ పదో సినిమాతో సిద్ధు జొన్నలగడ్డ మళ్లీ బాక్సాఫీస్ వద్ద తన సత్తా చాటుతాడో లేదో చూడాలి.
