తెలుగు సినీ పరిశ్రమలో స్టార్ హీరోగా గుర్తింపు తెచ్చుకున్న పవర్ స్టార్ పవన్ కళ్యాణ్.. ప్రస్తుతం ఆంధ్రప్రదేశ్ ఉప ముఖ్యమంత్రిగా కూడా కీలక బాధ్యతలు నిర్వహిస్తున్నారు. అయితే తాజాగా పవన్ కళ్యాణ్ వ్యక్తిగత జీవితానికి సంబంధించిన ఓ వార్త సోషల్ మీడియాలో హాట్ టాపిక్‌గా మారింది. తన భార్య అన్నా లెజినోవాతో విడిపోతున్నట్లు అధికారికంగా ప్రకటించినట్లు ప్రచారం జరుగుతోంది. ఈ వార్తతో జనసేన కార్యకర్తలు, పవన్ అభిమానులు ఒక్కసారిగా ఆశ్చర్యానికి గురవుతున్నారు.
అయితే పవన్ కళ్యాణ్, అన్నా లెజినోవా విడిపోవడానికి గల వ్యక్తిగత కారణాలను మాత్రం వెల్లడించలేదు. పరస్పర గౌరవం, అవగాహనతో ఈ నిర్ణయం తీసుకున్నామని, తమ వ్యక్తిగత జీవితానికి సంబంధించిన గోప్యతను గౌరవించాలని అభిమానులు, మీడియాను కోరినట్లు సమాచారం. మరోవైపు సోషల్ మీడియాలో మాత్రం వీరి విడిపోవడానికి సంబంధించి రకరకాల ఊహాగానాలు వినిపిస్తున్నాయి. పవన్ కళ్యాణ్ రాజకీయాల్లో బిజీగా ఉండటం, కుటుంబానికి సమయం కేటాయించలేకపోవడం వంటి కారణాలపై చర్చ జరుగుతోంది. అయితే వీటిలో ఏది నిజమనే దానిపై ఎలాంటి అధికారిక స్పష్టత లేదు.
ఇక పవన్ కళ్యాణ్, అన్నా లెజినోవా పరిచయం విషయానికి వస్తే.. 2011లో విడుదలైన ‘తీన్మార్’ సినిమా సమయంలో వీరిద్దరికీ పరిచయం ఏర్పడినట్లు తెలుస్తోంది. ఆ పరిచయం ప్రేమగా మారడంతో 2013 సెప్టెంబర్ 30న వివాహం చేసుకున్నారు. వీరికి మార్క్ శంకర్ పవనోవిచ్ అనే కుమారుడు కూడా ఉన్నారు.
పవన్ కళ్యాణ్ రాజకీయాల్లోకి వచ్చిన తర్వాత ఆయన కుటుంబానికి సంబంధించిన విషయాలు కూడా తరచూ వార్తల్లో నిలుస్తున్నాయి. అయితే ఎంతోకాలంగా కొనసాగిన తమ వైవాహిక బంధంపై ఈ జంట తీసుకున్న నిర్ణయం ఇప్పుడు చర్చనీయాంశంగా మారింది. ముఖ్యంగా పిల్లల విషయంలో తల్లిదండ్రులుగా తమ బాధ్యతలను కొనసాగిస్తామని ప్రకటించినట్లు సమాచారం.
మొత్తానికి పవన్ కళ్యాణ్ వ్యక్తిగత జీవితానికి సంబంధించిన ఈ వార్త ప్రస్తుతం సినీ, రాజకీయ వర్గాల్లో చర్చకు దారితీసింది. అయితే విడిపోవడానికి గల అసలు కారణాలపై స్పష్టత వచ్చే వరకు వస్తున్న ఊహాగానాలను నమ్మకపోవడమే మంచిది.
