బ్రిటిష్ పాలన నేపథ్యంలో సినిమాలు తీయాలంటే దేశభక్తి ఒక్కటే సరిపోదా? బాక్సాఫీస్ దగ్గర ఈ పీరియడ్ సినిమాల సక్సెస్ రేట్ చూస్తే ఇదే అనుమానం వస్తోంది!
విజయ్ దేవరకొండ నటించిన రణబాలి మిక్స్‌డ్ టాక్‌తో ముందుకు సాగుతుండటంతో, మరోసారి ఈ జానర్‌పై చర్చ మొదలైంది. గతంలో అల్లూరి సీతారామరాజు, ఆర్ఆర్ఆర్ సినిమాలు ప్రేక్షకులను ఆకట్టుకోగా.. సైరా నరసింహారెడ్డి, కంచె వంటి చిత్రాలు మాత్రం ఆశించిన స్థాయిలో ప్రభావం చూపలేకపోయాయి. అంటే దేశభక్తి, త్యాగాలు చూపిస్తే సరిపోదు.. కథలో ఎమోషన్, ఇంట్రెస్ట్, అదిరిపోయే ట్విస్టులు కూడా ఉండాలి.
ఇప్పుడు అందరి చూపు ప్రభాస్ నటిస్తున్న ఫౌజీపై పడింది. హను రాఘవపూడి దర్శకత్వంలో తెరకెక్కుతున్న ఈ సినిమా 1940ల నేపథ్యంలో సాగుతుందని, రెండో ప్రపంచ యుద్ధం, బ్రిటిష్ పాలనకు వ్యతిరేకంగా జరిగిన పోరాటం వంటి అంశాలు ఇందులో ఉంటాయని సమాచారం. ఆజాద్ హింద్ ఫౌజ్‌కు సంబంధించిన సైనికుడి పాత్రలో ప్రభాస్ కనిపించనున్నాడనే ప్రచారం కూడా ఉంది.
అయితే ఇక్కడే అసలు టాస్క్ మొదలవుతుంది. ప్రభాస్ లాంటి పాన్ ఇండియా స్టార్ ఉన్నా.. కథలో బలం లేకపోతే ప్రేక్షకులను మెప్పించడం కష్టమే. ముఖ్యంగా స్లో నేరేషన్, సెకండాఫ్‌లో తగ్గిపోయే వేగం లాంటి సమస్యలు లేకుండా, ఎమోషన్స్‌తో పాటు ఉత్కంఠను కూడా పీక్స్‌కు తీసుకెళ్లాలి.
మరి ఫౌజీతో ప్రభాస్ బాక్సాఫీస్ దగ్గర సత్తా చాటుతాడా? లేక బ్రిటిష్ కాలం నాటి పీరియడ్ సినిమాలకు మరోసారి నిరాశే ఎదురవుతుందా? అన్నది చూడాలి!
