విజయ్ దేవరకొండ, రష్మిక మందన్న జంటగా నటిస్తున్న మోస్ట్ అవైటెడ్ పీరియాడిక్ యాక్షన్ డ్రామా ‘రణబాలి’. రాహుల్ సాంకృత్యన్ దర్శకత్వంలో తెరకెక్కుతున్న ఈ సినిమాను మైత్రి మూవీ మేకర్స్ భారీ స్థాయిలో నిర్మిస్తున్నారు. దసరా కానుకగా అక్టోబర్ 16న ఈ సినిమా ప్రపంచవ్యాప్తంగా ప్రేక్షకుల ముందుకు రాబోతోంది.
ఇప్పటికే ఈ సినిమాపై భారీ అంచనాలు నెలకొనగా.. మేకర్స్ ప్రమోషన్స్లో కూడా కొత్తదనాన్ని చూపిస్తున్నారు. సాధారణంగా సినిమా కథను పోస్టర్లు, టీజర్లు, ట్రైలర్ల ద్వారా పరిచయం చేస్తారు. కానీ ‘రణబాలి’ టీమ్ మాత్రం ఏకంగా నాలుగు డాక్యుమెంటరీల ద్వారా సినిమా కథకు సంబంధించిన నేపథ్యాన్ని ప్రేక్షకులకు పరిచయం చేయబోతోంది.
నిజ జీవిత ఘటనలే కథకు ఆధారం!
ఈ సిరీస్లో భాగంగా తాజాగా మొదటి డాక్యుమెంటరీ **‘ది ఫెమిన్ వుయ్ ఫర్గాట్’**ను విడుదల చేశారు. ఇందులో దర్శకుడు రాహుల్ సాంకృత్యన్తో పాటు విజయ్ దేవరకొండ, రష్మిక మందన్న ఈ సినిమా కథకు సంబంధించిన ఆసక్తికరమైన విషయాలను వెల్లడించారు.
దర్శకుడు రాహుల్ సాంకృత్యన్ చెప్పిన వివరాల ప్రకారం.. సుమారు 150 ఏళ్ల క్రితం జరిగిన కొన్ని వాస్తవ సంఘటనలను ఆధారంగా చేసుకుని ఈ కథను రూపొందించారు.
ముఖ్యంగా 1876 నుంచి 1878 మధ్య బ్రిటిష్ పాలన కాలంలో రాయలసీమ ప్రాంతాన్ని తీవ్రంగా ప్రభావితం చేసిన కరువు, ప్రజలు ఎదుర్కొన్న ఆకలి, వలస పాలనలో జరిగిన దోపిడీ వంటి చారిత్రక అంశాలను ఈ కథలో చూపించబోతున్నట్లు తెలుస్తోంది.
ఈ కథను సిద్ధం చేయడానికి మేకర్స్ భారీ స్థాయిలో రీసెర్చ్ కూడా చేశారట. బళ్లారి, మద్రాస్ వంటి ప్రాంతాలకు వెళ్లడంతో పాటు.. పలు కలెక్టర్ కార్యాలయాల్లో ఉన్న పాత రికార్డులను పరిశీలించి కథకు సంబంధించిన వివరాలను సేకరించినట్లు దర్శకుడు తెలిపారు.
అందుకే ఈ డాక్యుమెంటరీకి ‘ది ఫెమిన్ వుయ్ ఫర్గాట్’ అనే టైటిల్ పెట్టడం కూడా ఆసక్తిని పెంచుతోంది. అప్పటి పరిస్థితులు, ప్రజల జీవితాలు, కరువు వెనుక ఉన్న చారిత్రక నేపథ్యాన్ని ప్రేక్షకులకు పరిచయం చేసేలా ఈ వీడియోను రూపొందించారు.
ఇక మేకర్స్ విడుదల చేసిన ఈ మొదటి డాక్యుమెంటరీ ప్రస్తుతం సోషల్ మీడియాలో వైరల్ అవుతోంది. ఇంకా మూడు డాక్యుమెంటరీలను కూడా వరుసగా విడుదల చేయబోతున్నారు.
ఇక సినిమాలో విజయ్ దేవరకొండ సింగనమల బొబ్బిలి రణబాలి పాత్రలో కనిపించనుండగా.. రష్మిక మందన్న జయమ్మ పాత్రలో కనిపించనుంది.
ముఖ్యంగా పెళ్లి తర్వాత విజయ్ దేవరకొండ, రష్మిక మందన్న కలిసి ప్రేక్షకుల ముందుకు వస్తున్న సినిమా కావడంతో ఈ సినిమాపై మరింత ఆసక్తి నెలకొంది.
మరి భారీ అంచనాల మధ్య అక్టోబర్ 16న థియేటర్లలోకి రాబోతున్న ‘రణబాలి’ ఎలాంటి అనుభూతిని అందిస్తుందో చూడాలి.
