ప్రముఖ సినీనటి షకీలా గురించి ప్రత్యేకంగా పరిచయం చేయాల్సిన అవసరం లేదు. ఒకప్పుడు వరుస సినిమాలతో, ముఖ్యంగా వైవిధ్యమైన పాత్రలతో భారీ క్రేజ్ సంపాదించుకున్న ఆమె.. ప్రస్తుతం సినిమాల్లో అవకాశాలు తగ్గడంతో అప్పుడప్పుడు మాత్రమే తెరపై కనిపిస్తున్నారు. అయితే తాజాగా షకీలా తనకు ఎదురైన ఓ అనారోగ్య సమస్య గురించి చెప్పడంతో మరోసారి వార్తల్లో నిలిచారు.
మొబైల్ ఫోన్ను ఎక్కువగా ఉపయోగించడం వల్ల తీవ్రమైన మెడ నొప్పికి గురయ్యానని, చివరకు శస్త్రచికిత్స కూడా చేయించుకోవాల్సి వచ్చిందని షకీలా వెల్లడించారు. అంతేకాదు.. ఈ సర్జరీ కోసం దాదాపు రూ.3 లక్షలు ఖర్చు చేసినట్లు ఆమె తెలిపారు. దీంతో అసలు ఆమెకు ఏం జరిగిందనే విషయం ఇప్పుడు సోషల్ మీడియాలో చర్చనీయాంశంగా మారింది.
మొబైల్ ఎక్కువగా వాడటమే కారణమా?
షకీలా తన అనుభవాన్ని అభిమానులతో పంచుకుంటూ.. ఫోన్ అవసరమే కానీ, దానిని అవసరానికి మించి ఉపయోగించడం మాత్రం ప్రమాదకరమని సూచించారు. ముఖ్యంగా గంటల తరబడి యూట్యూబ్ వీడియోలు, ఇన్స్టాగ్రామ్ రీల్స్ చూడటం, గేమ్స్ ఆడటం వంటి వాటికి ఎక్కువ సమయం కేటాయించవద్దని ఆమె చెప్పారు.
తాను కూడా ఇదే విధంగా ఎక్కువసేపు మొబైల్ ఉపయోగించడంతో మెడ నొప్పి తీవ్రంగా మారిందని షకీలా తెలిపారు. ముఖ్యంగా నిద్రపోయే సమయంలో ఒకవైపుకు వాలి గంటల తరబడి ఫోన్ చూడటం వల్ల మెడపై ఒత్తిడి పెరిగిందని చెప్పారు. చివరకు పరిస్థితి సర్జరీ చేయించుకునే స్థాయికి వెళ్లిందని వెల్లడించారు.
ఈ సమస్యకు చికిత్స కోసం సుమారు రూ.3 లక్షలు ఖర్చయ్యాయని ఆమె తెలిపారు. అందుకే మొబైల్ను వినోదం కోసం గంటల తరబడి ఉపయోగించకుండా.. అవసరమైనంతవరకే పరిమితం చేయాలని సూచించారు. ముఖ్యంగా చిన్నపిల్లలకు ఫోన్ ఇచ్చే విషయంలో తల్లిదండ్రులు జాగ్రత్తగా ఉండాలని షకీలా హెచ్చరించారు.
షకీలా చేసిన ఈ వ్యాఖ్యలు ప్రస్తుతం సోషల్ మీడియాలో వైరల్ అవుతున్నాయి. ఆమెకు ఎదురైన అనుభవం చూసి అభిమానులు కూడా ఆశ్చర్యం వ్యక్తం చేస్తున్నారు.
షకీలా సినీ కెరీర్ ఎలా మొదలైంది?
షకీలా తన 18వ ఏట తమిళ చిత్రం ప్లే గర్ల్స్ ద్వారా సినీ రంగంలోకి అడుగుపెట్టారు. ఆ తర్వాత 2000లో వచ్చిన మలయాళ చిత్రం కిన్నార తుంబికల్ ఆమె కెరీర్ను ఒక్కసారిగా మార్చేసింది. ఈ సినిమాతో ఆమెకు భారీ గుర్తింపు వచ్చింది.
తెలుగులో దర్శకుడు తేజ తెరకెక్కించిన జయం సినిమాతో తెలుగు ప్రేక్షకులకు పరిచయమయ్యారు. ఆ తర్వాత బంగారం, తొట్టి గ్యాంగ్, నిజం వంటి పలు సినిమాల్లో నటించి తనకంటూ ప్రత్యేక గుర్తింపు తెచ్చుకున్నారు.
అప్పుడప్పుడు సినిమాల్లో కనిపిస్తున్న షకీలా.. రియాలిటీ షోలలో కూడా సందడి చేశారు. బిగ్బాస్ షోలో పాల్గొని ప్రేక్షకులను అలరించిన ఆమె.. ఎక్కువకాలం కొనసాగకుండానే బయటకు వచ్చారు.
ఇప్పుడు మొబైల్ ఫోన్ వినియోగంపై షకీలా చేసిన ఈ వ్యాఖ్యలు మరోసారి ఆమెను వార్తల్లోకి తీసుకొచ్చాయి. ఆమె అనుభవం నిజంగానే మొబైల్ వినియోగంపై ప్రతి ఒక్కరూ ఒకసారి ఆలోచించేలా చేస్తోంది.
