కీర్తి సురేష్ సోషల్ మీడియాలో ఓ నెటిజన్ చేసిన కామెంట్కు తనదైన శైలిలో సరదాగా స్పందించారు. నాని నటిస్తున్న ‘ది ప్యారడైజ్’ సినిమాలో ఆమె ఐటం సాంగ్లో కనిపించబోతున్నారనే ప్రచారం కొంతకాలంగా జరుగుతోంది. అయితే దీనిపై చిత్రబృందం నుంచి ఇప్పటివరకు అధికారిక ప్రకటన రాలేదు. ఈ నేపథ్యంలో ఓ ఇన్స్టాగ్రామ్ యూజర్ కీర్తిని విమర్శిస్తూ.. చెప్పుకోదగ్గ పాత్రలు లేకపోవడం వల్లే ఐటం సాంగ్స్ ఎంచుకుంటున్నారంటూ కామెంట్ చేశాడు. అంతేకాకుండా ‘ది ప్యారడైజ్’ను కన్నడ సినిమాగా పేర్కొన్నాడు.
ఈ కామెంట్పై కీర్తి సురేష్ సీరియస్గా స్పందించకుండా.. చిన్నపాటి వ్యంగ్యంతో నెటిజన్కు కౌంటర్ ఇచ్చారు. నాని తెలుగు సినిమాల్లో నటిస్తారని, ‘ది ప్యారడైజ్’ తెలుగు చిత్రమని గుర్తుచేస్తూ తన సమాధానాన్ని ఇచ్చారు. ఎలాంటి పెద్ద వివరణ ఇవ్వకుండా కేవలం చిన్న సవరణ చేసినట్టుగా ఆమె ఇచ్చిన రిప్లై అభిమానులను ఆకట్టుకుంది. దీంతో కీర్తి స్పందించిన తీరు ప్రస్తుతం సోషల్ మీడియాలో వైరల్గా మారింది.
ఇక ‘ది ప్యారడైజ్’ విషయానికి వస్తే.. నాని హీరోగా శ్రీకాంత్ ఓదెల దర్శకత్వంలో తెరకెక్కుతున్న ఈ యాక్షన్ థ్రిల్లర్పై భారీ అంచనాలు ఉన్నాయి. గతంలో వీరిద్దరి కాంబినేషన్లో వచ్చిన ‘దసరా’ సూపర్ హిట్ కావడంతో ఈ సినిమాపై ఆసక్తి మరింత పెరిగింది. అనిరుధ్ రవిచందర్ సంగీతం అందిస్తున్న ఈ చిత్రంలో రాఘవ్ జుయల్, మోహన్ బాబు, కయదు లోహర్, తనికెళ్ల భరణి, సోనాలి కులకర్ణి తదితరులు కీలక పాత్రల్లో నటిస్తున్నారు. పలుమార్లు వాయిదా పడిన అనంతరం ఈ సినిమాను 2026 సెప్టెంబర్ 24న విడుదల చేయనున్నట్లు మేకర్స్ ప్రకటించారు. ఇక కీర్తి సురేష్ ఐటం సాంగ్లో కనిపిస్తారనే ప్రచారంపై అధికారిక ప్రకటన వస్తేనే పూర్తి క్లారిటీ రానుంది.
