ప్రపంచ సంగీత చరిత్రలో మైఖేల్ జాక్సన్ పేరు ఓ ప్రత్యేక అధ్యాయం. ‘కింగ్ ఆఫ్ పాప్’గా కోట్లాది మంది అభిమానులను సంపాదించుకున్న ఆయన.. తన అద్భుతమైన డ్యాన్స్ మూవ్స్, ముఖ్యంగా మూన్వాక్తో ప్రపంచవ్యాప్తంగా చెరగని ముద్ర వేశారు. అలాంటి లెజెండరీ ఆర్టిస్ట్ జీవిత కథ ఆధారంగా తెరకెక్కిన ‘మైఖేల్’ మూవీ ఇప్పుడు ఓటీటీ ప్రేక్షకులను అలరించేందుకు సిద్ధమవుతోంది.
మైఖేల్ జాక్సన్ పుట్టినరోజు సందర్భంగా ఆగస్టు 29 నుంచి ఈ చిత్రం జియోహాట్స్టార్లోని పీకాక్ హబ్ ద్వారా స్ట్రీమింగ్ కానుంది. ఇంగ్లీష్తో పాటు హిందీ భాషలో కూడా అందుబాటులోకి రానుండటంతో భారతీయ ప్రేక్షకుల్లో ఈ బయోపిక్పై మరింత ఆసక్తి నెలకొంది.
ఈ చిత్రంలో మైఖేల్ జాక్సన్ పాత్రను ఆయన మేనల్లుడు జాఫర్ జాక్సన్ పోషించడం ప్రత్యేక ఆకర్షణగా నిలిచింది. రూపంలోనే కాదు.. హావభావాలు, బాడీ లాంగ్వేజ్, స్టేజ్ ప్రెజెన్స్, డ్యాన్స్ మూవ్స్లోనూ మైఖేల్ను గుర్తు చేసేలా జాఫర్ నటించాడని ఇప్పటికే విడుదలైన ప్రచార చిత్రాలు చూసిన అభిమానులు ప్రశంసిస్తున్నారు. ముఖ్యంగా ఆయన చేసిన మూన్వాక్ సన్నివేశాలు అభిమానులకు ప్రత్యేక అనుభూతిని కలిగిస్తాయని చెబుతున్నారు.
ఈ చిత్రానికి ప్రముఖ దర్శకుడు ఆంటోయిన్ ఫుక్వా దర్శకత్వం వహించారు. యాక్షన్ చిత్రాలతో తనకంటూ ప్రత్యేక గుర్తింపు తెచ్చుకున్న ఆయన.. ఈసారి ప్రపంచ సంగీత దిగ్గజం జీవితాన్ని వెండితెరపై ఆవిష్కరించే ప్రయత్నం చేశారు.
సినిమాలో మైఖేల్ జాక్సన్ చిన్ననాటి నుంచి ప్రపంచవ్యాప్తంగా పాప్ ఐకాన్గా ఎదిగిన ప్రయాణాన్ని చూపించనున్నారు. ‘జాక్సన్ 5’ రోజుల నుంచి సొంత గుర్తింపు సాధించడం, ‘Thriller’, ‘Billie Jean’, ‘Beat It’, ‘Smooth Criminal’, ‘Black or White’ వంటి పాటలతో ప్రపంచ సంగీత చరిత్రను మార్చేసిన తీరు ఇందులో ప్రధానంగా ఉండనుంది. అదే సమయంలో ఆయన ఎదుర్కొన్న ఒత్తిళ్లు, వివాదాలు, వ్యక్తిగత జీవితంలోని సవాళ్లు కూడా కథలో భాగమవుతాయని సమాచారం.
ఇప్పటికే ‘Bohemian Rhapsody’, ‘Elvis’, ‘Rocketman’ వంటి సంగీత దిగ్గజాల బయోపిక్స్ ప్రపంచవ్యాప్తంగా ఘన విజయాలు సాధించాయి. ఇప్పుడు అదే జాబితాలో ‘మైఖేల్’ కూడా చేరనుండటంతో ఈ సినిమాపై భారీ అంచనాలు ఏర్పడ్డాయి.
మ్యూజిక్, డ్యాన్స్ను ఇష్టపడే ప్రేక్షకులతో పాటు మైఖేల్ జాక్సన్ అభిమానులకు ఈ బయోపిక్ ఓ ప్రత్యేక అనుభూతిని అందించనుంది. మరి ఆగస్టు 29 నుంచి జియోహాట్స్టార్లో స్ట్రీమింగ్ కానున్న ఈ చిత్రం ప్రేక్షకులను ఎంతగా ఆకట్టుకుంటుందో చూడాలి.
