టాలీవుడ్ బుట్టబొమ్మ పూజా హెగ్డేకు ఎట్టకేలకు భారీ అవకాశం దక్కబోతోందా? గత కొంతకాలంగా సరైన విజయాలు లేక టాలీవుడ్లో కాస్త వెనుకబడిన ఈ స్టార్ హీరోయిన్ పేరు ఇప్పుడు మరోసారి హాట్ టాపిక్గా మారింది. ఫిల్మ్ నగర్లో వినిపిస్తున్న తాజా వార్తల ప్రకారం, పవర్ స్టార్ పవన్ కళ్యాణ్ నటించనున్న ‘ఓజీ 2’ సినిమాలో హీరోయిన్గా పూజా హెగ్డేను పరిశీలిస్తున్నట్లు ప్రచారం జరుగుతోంది.
ఇటీవలే పవన్ కళ్యాణ్–సుజిత్ కాంబినేషన్లో తెరకెక్కనున్న ‘ఓజీ 2’ ప్రాజెక్ట్ ప్రకటించబడిన సంగతి తెలిసిందే. ఈ సీక్వెల్పై ఇప్పటికే భారీ అంచనాలు నెలకొన్నాయి. ఇప్పుడు ఈ చిత్రంలో హీరోయిన్గా పూజా హెగ్డే పేరు వినిపించడంతో అభిమానుల్లో మరింత ఆసక్తి పెరిగింది.
అసలు చూస్తే పవన్ కళ్యాణ్, పూజా హెగ్డే కాంబినేషన్ చాలా కాలం క్రితమే సెట్ కావాల్సింది. హరీష్ శంకర్ దర్శకత్వంలో తెరకెక్కిన ‘ఉస్తాద్ భగత్ సింగ్’ కోసం మొదట పూజా హెగ్డే పేరే ప్రధానంగా వినిపించింది. అయితే డేట్స్ సమస్యలు, ఇతర కారణాల వల్ల ఆ కాంబినేషన్ కార్యరూపం దాల్చలేదు.
ఇప్పుడు ‘ఓజీ 2’లో ఈ జోడీ నిజంగా కలిస్తే, అది అభిమానులకు మాత్రమే కాదు పూజా హెగ్డే కెరీర్కూ పెద్ద టర్నింగ్ పాయింట్గా మారే అవకాశం ఉందని సినీ వర్గాలు భావిస్తున్నాయి. వరుస పరాజయాల తర్వాత మరో భారీ పాన్ ఇండియా ప్రాజెక్ట్లో అవకాశం దక్కితే, ఆమెకు ఇది బలమైన కమ్బ్యాక్ అవుతుందని అభిమానులు ఆశిస్తున్నారు.
అయితే ఇప్పటివరకు ఈ విషయంపై చిత్రబృందం నుంచి ఎలాంటి అధికారిక ప్రకటన రాలేదు. కాబట్టి ప్రస్తుతం సోషల్ మీడియాలో వైరల్ అవుతున్న ఈ వార్తల్లో ఎంత నిజం ఉందో తెలియాలంటే అధికారిక అప్డేట్ వచ్చే వరకు వేచి చూడాల్సిందే.
