అల్లు అర్జున్ సినిమా మొదలైందంటే ప్రమోషన్స్ విషయంలో మేకర్స్ నుంచి రెగ్యులర్ అప్డేట్స్ వస్తాయని అభిమానులు ఎక్స్పెక్ట్ చేస్తుంటారు. బన్నీ కూడా తన సినిమాలను ఎప్పటికప్పుడు వార్తల్లో ఉంచేందుకు తనదైన స్టైల్లో ప్రమోషనల్ స్ట్రాటజీని ఫాలో అవుతుంటాడు. కానీ అట్లీ దర్శకత్వంలో తెరకెక్కుతున్న ‘రాకా’ విషయంలో మాత్రం సీన్ పూర్తిగా డిఫరెంట్గా ఉంది.
ఈ సినిమా సెట్స్పైకి వచ్చి ఏడాది దాటిపోయినా ఇప్పటివరకు పెద్దగా ఎలాంటి అప్డేట్స్ బయటకు రాలేదు. టైటిల్, ఫస్ట్ లుక్ మినహా మూవీ టీమ్ నుంచి అభిమానులకు చెప్పుకోదగ్గ సమాచారం ఏదీ అందలేదు.
టీజర్పై మళ్లీ మొదలైన చర్చ
‘రాకా’ టీజర్కు సంబంధించి గతంలో ఎన్నో వార్తలు వచ్చాయి. అయితే మేకర్స్ మాత్రం ఇప్పటివరకు టీజర్ విషయంలో ఎలాంటి అధికారిక హింట్ ఇవ్వలేదు. తాజాగా అక్టోబర్లో టీజర్ విడుదలయ్యే అవకాశం ఉందంటూ మరోసారి సోషల్ మీడియాలో ప్రచారం మొదలైంది.
ఈ ప్రచారం నిజమో కాదో తెలియకముందే మూవీ నిర్మాణ సంస్థ సన్ పిక్చర్స్ చేసిన ఓ పోస్ట్ ఇప్పుడు అందరి దృష్టినీ ఆకర్షిస్తోంది.
‘37’.. అసలు ఈ నంబర్ ఏంటి?
సన్ పిక్చర్స్ తమ అధికారిక ఎక్స్ అకౌంట్లో ‘37’ అనే నంబర్తో ‘రాకా’కు సంబంధించిన ఓ కొత్త పోస్టర్ను విడుదల చేసింది. ఆశ్చర్యకరంగా ఆ పోస్టర్లో ‘37’ అనే అంకె తప్ప మరే వివరాలు కనిపించలేదు.
దీంతో బన్నీ అభిమానుల్లో ఇప్పుడు అసలు ఈ 37 ఏంటనే చర్చ మొదలైంది.
2027లో ఏడో నెల, మూడో తేదీన అంటే జూలై 3న సినిమా రిలీజ్ కానుందనే హింట్ ఇస్తున్నారా? లేక త్వరలో టీజర్ విడుదల చేయబోతున్నామని, దాని నిడివి 37 సెకన్లు అని చెబుతున్నారా? లేక ఈ నంబర్ వెనుక మరేదైనా సీక్రెట్ ఉందా? అనేది ప్రస్తుతానికి సస్పెన్స్గా మారింది.
ఏదేమైనా ‘37’ పోస్టర్తో ‘రాకా’ మళ్లీ సోషల్ మీడియాలో ట్రెండ్ అవుతోంది. ఇన్నాళ్లుగా సైలెంట్గా ఉన్న మూవీ టీమ్ త్వరలోనే ఏదో ఒక కీలకమైన అప్డేట్ ఇవ్వబోతుందనే సంకేతాలు మాత్రం కనిపిస్తున్నాయి.
రూ.800 కోట్లకు పైగా బడ్జెట్తో రాకా
సన్ పిక్చర్స్ భారీ స్థాయిలో నిర్మిస్తున్న ఈ సినిమాకు రూ.800 కోట్లకు పైగా బడ్జెట్ ఖర్చు చేస్తున్నట్లు సమాచారం. అట్లీ దర్శకత్వంలో తెరకెక్కుతున్న ఈ పాన్ ఇండియా ప్రాజెక్ట్పై ఇప్పటికే భారీ అంచనాలు ఉన్నాయి.
ఈ సినిమాలో అల్లు అర్జున్ సరసన దీపికా పదుకొనే, మృణాల్ ఠాకూర్, రష్మిక మందన్నా కీలక పాత్రల్లో నటిస్తున్నారు. ఫస్ట్ లుక్ను బట్టి చూస్తే బన్నీ ఈ సినిమాలో మృగం తరహా అవతార్లో కనిపించబోతున్నట్లు అర్థమవుతోంది. అంతేకాదు, సినిమాలో ఆయన మరిన్ని విభిన్న అవతారాల్లో కనిపించనున్నట్లు కూడా ప్రచారం జరుగుతోంది.
సాయి అభ్యంకర్ ఈ చిత్రానికి సంగీతం అందిస్తున్నారు.
మొత్తానికి ఇప్పటివరకు పెద్దగా అప్డేట్స్ ఇవ్వకుండా సైలెంట్గా ఉన్న ‘రాకా’ టీమ్.. ఒక్క ‘37’ నంబర్తో మాత్రం సోషల్ మీడియాలో పెద్ద చర్చకే తెరలేపింది. మరి ఈ 37 వెనుక ఉన్న అసలు మిస్టరీ ఏంటో మేకర్స్ ఎప్పుడు రివీల్ చేస్తారో చూడాలి.
