కోలీవుడ్ స్టార్ హీరో సూర్యకు తమిళనాడులోనే కాకుండా తెలుగులోనూ మంచి క్రేజ్ ఉంది. ఆయన నటించిన ప్రతి సినిమా తమిళంతో పాటు తెలుగులో కూడా విడుదలవుతూ ప్రేక్షకులను ఆకట్టుకుంటోంది. ఇప్పటివరకు తన కెరీర్లో 46 సినిమాలు పూర్తి చేసిన సూర్య.. ఇప్పుడు తన 47వ సినిమాతో ప్రేక్షకుల ముందుకు వచ్చేందుకు సిద్ధమవుతున్నారు.
సూర్య 47వ సినిమాను ‘ఆవేశం’ ఫేమ్ డైరెక్టర్ జిత్తు మాధవన్ తెరకెక్కిస్తున్నారు. ఈ చిత్రంలో సూర్యకు జోడీగా నజ్రియా నటిస్తోంది. ఇప్పటికే దాదాపు షూటింగ్ పూర్తి చేసుకున్న ఈ మూవీ విడుదలకు సిద్ధమవుతోంది. తాజాగా మేకర్స్ ఈ సినిమాకు సంబంధించిన టైటిల్తో పాటు గ్లింప్స్ను విడుదల చేసి అభిమానుల్లో ఆసక్తిని పెంచారు.
వెరైటీ టైటిల్తో ఈ సినిమాకు ‘సీన్’ అనే పేరు పెట్టినట్లు ప్రకటించారు. అంతేకాకుండా ఈ ఏడాది నవంబర్ 6న దీపావళి కానుకగా సినిమాను ప్రేక్షకుల ముందుకు తీసుకురానున్నట్లు వెల్లడించారు. అయితే ఇదే సమయంలో భారీ అంచనాలతో తెరకెక్కుతున్న ‘రామాయణం’ కూడా దీపావళి సందర్భంగా థియేటర్లలోకి రానుండటంతో.. సూర్య సినిమా ఆ మూవీతో పోటీ పడనుంది.
ఇక ఈ సినిమాకు మరో ప్రత్యేకత కూడా ఉంది. సూర్య సతీమణి, నటి జ్యోతిక ఈ చిత్రానికి నిర్మాతగా వ్యవహరిస్తున్నారు. మలయాళ స్టార్ మ్యూజిక్ డైరెక్టర్ సుశిన్ శ్యామ్ సంగీతం అందిస్తున్నారు.
ఇటీవల కొంతకాలంగా సరైన విజయాల కోసం ఎదురుచూస్తున్న సూర్య.. ఇప్పుడు వరుస సినిమాలతో ప్రేక్షకులను అలరించేందుకు సిద్ధమవుతున్నారు. ఈ ఏడాది ఇప్పటికే ఆయన నటించిన ‘కరువు’ సినిమా మే 15న ప్రేక్షకుల ముందుకు వచ్చింది. తెలుగులో ‘వీరభద్రుడు’ పేరుతో విడుదలైన ఈ చిత్రం మంచి విజయాన్ని అందుకుంది.
ఇక ఇప్పుడు ‘సీన్’ సినిమాతో సూర్య మరోసారి బాక్సాఫీస్ వద్ద తన సత్తా చాటుతారా? దీపావళి బరిలో భారీ పోటీని తట్టుకుని ఎలాంటి విజయాన్ని అందుకుంటారు? అనేది ఆసక్తికరంగా మారింది.
