టాలీవుడ్లో ప్రస్తుతం భారీ అంచనాలు నెలకొన్న పాన్ వరల్డ్ ప్రాజెక్టుల్లో రాకా కూడా ఒకటిగా నిలుస్తోంది. ఐకాన్ స్టార్ అల్లు అర్జున్ హీరోగా, కోలీవుడ్ స్టార్ డైరెక్టర్ అట్లీ దర్శకత్వంలో తెరకెక్కుతున్న ఈ సినిమాపై మొదటి నుంచే ప్రేక్షకుల్లో భారీ ఆసక్తి ఉంది.
సన్ పిక్చర్స్ బ్యానర్పై కళానిధి మారన్ భారీ బడ్జెట్తో ఈ చిత్రాన్ని నిర్మిస్తున్నారు. ఇందులో బాలీవుడ్ స్టార్ హీరోయిన్ దీపికా పదుకొనే కీలక పాత్రలో నటిస్తుండగా.. రష్మిక మందన్న నెగిటివ్ షేడ్ ఉన్న పాత్రలో కనిపించబోతున్నట్లు ప్రచారం జరుగుతోంది.
సినిమాకు సంబంధించిన పూర్తి వివరాలను మేకర్స్ గోప్యంగా ఉంచుతున్నప్పటికీ.. ఎప్పటికప్పుడు బయటకు వస్తున్న చిన్న చిన్న అప్డేట్స్ సినిమాపై అంచనాలను మరింత పెంచుతున్నాయి.
‘రాకా’లో బబ్లూ పృథ్వీరాజ్
ఇప్పటికే ఈ సినిమాలో సీనియర్ నటుడు బబ్లూ పృథ్వీరాజ్ కూడా నటిస్తున్నట్లు వార్తలు వచ్చాయి. తాజాగా ఆయన స్వయంగా ఈ విషయాన్ని వెల్లడించడంతో ఈ అప్డేట్పై ఆసక్తి పెరిగింది.
అల్లు అర్జున్, అట్లీ కాంబినేషన్లో రూపొందుతున్న ఈ భారీ ప్రాజెక్ట్లో తాను కూడా భాగమవుతున్నానని బబ్లూ తెలిపారు. అంతేకాకుండా దీపికా పదుకొనేతో కలిసి కొన్ని ప్రత్యేక సన్నివేశాల్లో నటించినట్లు చెప్పారు.
అల్లు అర్జున్తో కలిసి నటించాలన్న తన కోరిక నెరవేరిందని.. ఆయనతో కలిసి పనిచేయడం ఎంతో ప్రత్యేకమైన అనుభూతి అని బబ్లూ పేర్కొన్నారు.
కథ, పాత్ర గురించి చెప్పలేనన్న బబ్లూ
‘రాకా’ కథ, తన పాత్రకు సంబంధించిన వివరాలను బయటకు చెప్పడానికి బబ్లూ నిరాకరించారు. సినిమా కథలోని కీలక విషయాలు బయటకు రాకుండా ఉండేందుకు షూటింగ్ ప్రారంభమైన సమయంలోనే తమకు కొన్ని గోప్యతా నిబంధనలు విధించారని తెలిపారు.
అయితే సినిమాలో తన పాత్ర చాలా కీలకంగా ఉంటుందని, ఇప్పటివరకు తాను చేసిన పాత్రలకు భిన్నంగా చాలా ప్రత్యేకంగా ఉంటుందని మాత్రం వెల్లడించారు.
అట్లీ ప్రతి సన్నివేశాన్ని ఎంతో శ్రద్ధగా, వివరంగా తెరకెక్కిస్తున్నారని.. సినిమా కోసం భారీ స్థాయిలో సాంకేతిక నిపుణులు, ప్రతిభావంతులైన నటీనటులు పనిచేస్తున్నారని బబ్లూ తెలిపారు.
అల్లు అర్జున్ ఎనర్జీపై ప్రశంసలు
అల్లు అర్జున్ నటన, సెట్స్లో ఆయన చూపించే ఎనర్జీని దగ్గరగా చూసే అవకాశం తనకు లభించిందని బబ్లూ చెప్పారు. ఆయన స్క్రీన్ ప్రెజెన్స్, వర్క్పై ప్రశంసలు కురిపించారు.
‘రాకా’ ప్రేక్షకుల ముందుకు వచ్చినప్పుడు సినీ ప్రపంచం మొత్తం ఆశ్చర్యపోయేలా సినిమా ఉంటుందని ఆయన అభిప్రాయపడ్డారు. ప్రపంచవ్యాప్తంగా ఉన్న ప్రతిభావంతులైన టెక్నీషియన్లు ఈ ప్రాజెక్ట్ కోసం పనిచేస్తున్నారని తెలిపారు.
మొత్తానికి.. బబ్లూ పృథ్వీరాజ్ వ్యాఖ్యలతో రాకాపై అంచనాలు మరింత పెరిగాయి. అల్లు అర్జున్, అట్లీ కాంబినేషన్లో తెరకెక్కుతున్న ఈ పాన్ వరల్డ్ మూవీ ఎలాంటి విజువల్ ట్రీట్ ఇవ్వబోతుందో తెలుసుకోవాలంటే సినిమా విడుదల వరకు వేచి చూడాల్సిందే.
