ప్రశాంత్ వర్మ సినిమాటిక్ యూనివర్స్ నుంచి వస్తున్న ప్రతిష్టాత్మక చిత్రాల్లో ‘మహాకాళి’ ఒకటి. ‘హనుమాన్’తో సంచలన విజయాన్ని అందుకున్న ప్రశాంత్ వర్మ.. తన సినిమాటిక్ యూనివర్స్ను మరింత విస్తరించే ప్రయత్నం చేస్తున్నారు. పూజా కొల్లూరు దర్శకత్వంలో తెరకెక్కుతున్న ఈ సినిమాపై ఇప్పటికే భారీ అంచనాలు ఉన్నాయి.
తాజాగా ఈ మూవీ నుంచి ‘శుక్రాచార్యుడి వార్ క్రై’ పేరుతో విడుదలైన గ్లింప్స్ ప్రేక్షకులను ఆకట్టుకుంటోంది. పౌరాణిక అంశాలను ఫాంటసీ, యాక్షన్తో కలిపి చూపించిన విధానం.. భారీ విజువల్స్ సినిమాపై ఆసక్తిని మరింత పెంచుతున్నాయి.
అక్షయ్ ఖన్నా అదరగొట్టేశారు!
బాలీవుడ్ వర్సటైల్ యాక్టర్ అక్షయ్ ఖన్నా ఈ సినిమాలో రాక్షస గురువు శుక్రాచార్యుడిగా కనిపించబోతున్నారు. గ్లింప్స్లో ఆయన లుక్, హావభావాలు, ఇంటెన్స్ యాక్టింగ్ సినిమాకు ప్రత్యేక ఆకర్షణగా నిలిచాయి.
అమృత మథనంలో దేవతలతో సమానంగా అసురులు కూడా కష్టపడినా.. అమృతాన్ని దేవతలకు మాత్రమే అందించడం న్యాయమా? ధర్మమా? అధర్మమా? అనే ప్రశ్నలతో శుక్రాచార్యుడి పాత్రలో అక్షయ్ ఖన్నా చెప్పిన డైలాగ్స్ గ్లింప్స్కు మరింత పవర్ను తీసుకొచ్చాయి.
అసుర జాతిని పాతాళానికి నెట్టేసి పద్నాలుగు లోకాల ద్వారాలను మూసివేశారని, త్వరలోనే అసుర విజయ ఘోష బ్రహ్మాండమంతా వినిపిస్తుందని ఆయన చెప్పే విధానం సినిమాపై మరింత ఆసక్తిని పెంచుతోంది.
రక్తబీజుడి మేల్కొలుపు!
అసురులకు విముక్తి కల్పించేందుకు పద్నాలుగు లోకాల ద్వారాలను తెరిచి.. భయంకరమైన రక్తబీజుడిని మేల్కొలిపే సన్నివేశాలు గ్లింప్స్లో హైలైట్గా నిలిచాయి.
రక్తబీజుడు మేల్కొన్న తర్వాత మానవజాతిపైకి యుద్ధం ప్రారంభమవుతున్నట్లు చూపించారు. ధర్మం, అధర్మం మధ్య జరగబోయే ఈ మహా సంగ్రామం సినిమాకు ప్రధాన కథాంశంగా ఉండబోతున్నట్లు గ్లింప్స్ చూస్తే అర్థమవుతోంది.
మహాకాళిగా శ్రియా రెడ్డి ఉగ్రరూపం!
గ్లింప్స్ చివర్లో శ్రియా రెడ్డి కనిపించిన తీరు సినిమాకే హైలైట్గా నిలిచింది. ఒకవైపు ఒడిలో పసిపాపను లాలిస్తూనే.. మరోవైపు ఆయుధాలు చేతబూని ఉగ్రరూపంలో కనిపించడం గూస్బంప్స్ తెప్పిస్తోంది.
మహాకాళి అవతారంలో శ్రియా రెడ్డి లుక్, ఆమె బాడీ లాంగ్వేజ్, ఇంటెన్స్ పెర్ఫార్మెన్స్ ప్రేక్షకులను ఆకట్టుకుంటున్నాయి. బ్యాక్గ్రౌండ్లో వినిపించే ‘పెద్దమ్మ చూస్తుందిరా!’ అనే మాటలు ఈ సన్నివేశానికి మరింత మాస్ ఎలివేషన్ ఇచ్చాయి.
భారీ తారాగణంతో ‘మహాకాళి’
ఈ సినిమాలో భూమి శెట్టి, రోహిత్ సరాఫ్, సముద్రఖని, ఖుష్బూ సుందర్, నాజర్ తదితరులు కీలక పాత్రల్లో నటిస్తున్నారు. ఆర్కేడీ స్టూడియోస్ నిర్మిస్తున్న ఈ చిత్రానికి స్మరణ్ సాయి సంగీతం అందిస్తున్నారు.
పౌరాణిక అంశాలతో తెరకెక్కుతున్న ఈ విజువల్ ట్రీట్ను 2027 జనవరి 8న ప్రపంచవ్యాప్తంగా ఐదు భాషల్లో ఐమాక్స్ 3Dలో విడుదల చేయనున్నట్లు మేకర్స్ ప్రకటించారు.
మొత్తానికి ‘మహాకాళి’ గ్లింప్స్ చూస్తుంటే ప్రశాంత్ వర్మ సినిమాటిక్ యూనివర్స్ మరో భారీ స్థాయికి వెళ్లబోతున్నట్లు కనిపిస్తోంది. అక్షయ్ ఖన్నా శుక్రాచార్యుడి పాత్ర, రక్తబీజుడి మేల్కొలుపు, శ్రియా రెడ్డి మహాకాళి అవతారం సినిమాపై అంచనాలను మరింత పెంచేశాయి. మరి ఈ సినిమా ప్రేక్షకులను ఏ స్థాయిలో ఆకట్టుకుంటుందో చూడాలి.
