రామ్ గోపాల్ వర్మ తెరకెక్కించిన ‘సత్య’ సినిమాకు సంబంధించి నటుడు, దర్శకుడు జేడీ చక్రవర్తి ఆసక్తికర విషయాలను వెల్లడించారు. ఈ సినిమాలో రచయిత కోన వెంకట్కు అవకాశం రావడం వెనుక తన పాత్ర ఉందని తెలిపారు. ఓ ఇంటర్వ్యూలో మాట్లాడిన జేడీ.. వర్మకు తెలియకుండానే కోన వెంకట్తో తొలుత ఓ పాట రాయించానని, ఆయనపై ఉన్న నమ్మకం, అభిమానం కారణంగానే ఈ నిర్ణయం తీసుకున్నానని చెప్పారు.
‘సత్య’ పోస్ట్ ప్రొడక్షన్ సమయంలో తాను ఎడిటింగ్, సౌండ్ డిజైన్ తదితర పనులను కూడా పర్యవేక్షించానని జేడీ తెలిపారు. ఆ సమయంలో కోన వెంకట్ రాసిన పాటలను రికార్డ్ చేయించానని, పాట నచ్చిన తర్వాత అదే నమ్మకంతో సినిమా డైలాగులు కూడా ఆయనతోనే రాయించినట్లు వెల్లడించారు. అయితే రామ్ గోపాల్ వర్మ మాత్రం డైలాగులను సత్యానంద్తో రాయించాలని భావించారని, అయినప్పటికీ కోన వెంకట్ ప్రతిభపై తనకు ఉన్న నమ్మకంతో ఆయనకు అవకాశం ఇచ్చానని జేడీ పేర్కొన్నారు.
తర్వాత 2004లో ‘దుబాయ్ శీను’ సినిమా సమయంలో కోన వెంకట్ తనను సంప్రదించి సినిమాలో నటిస్తే బాగుంటుందని చెప్పారని జేడీ గుర్తుచేసుకున్నారు. అయితే అది కేవలం వ్యక్తిగత స్నేహం కోసం తీసుకున్న నిర్ణయం కాదని, సినిమాకు అవసరమనే ఉద్దేశంతోనే అవకాశం ఇచ్చారని స్పష్టం చేశారు. కోన వెంకట్తో అప్పటికే మంచి పరిచయం, స్నేహం ఉండటంతోనే ఆ సినిమాలో కలిసి పనిచేశామని జేడీ తెలిపారు. ఆయన చేసిన తాజా వ్యాఖ్యలు ప్రస్తుతం సోషల్ మీడియాలో వైరల్గా మారాయి.
