వివాదాలతో తరచూ వార్తల్లో నిలిచే రాఖీ సావంత్ మరోసారి తన వ్యాఖ్యలతో సోషల్ మీడియాలో చర్చనీయాంశంగా మారారు. ఇస్లాం మతాన్ని స్వీకరించిన తర్వాత కూడా తనను ముస్లింగా అంగీకరించకుండా ట్రోల్ చేస్తున్న వారిపై ఆమె తీవ్ర ఆగ్రహం వ్యక్తం చేశారు. తన మత విశ్వాసాన్ని ప్రశ్నించే హక్కు ఎవరికీ లేదని స్పష్టం చేశారు. 2022లో ఆదిల్ ఖాన్ దురానీని వివాహం చేసుకున్న సమయంలో ఇస్లాం మతాన్ని స్వీకరించి తన పేరును ఫాతిమాగా మార్చుకున్న రాఖీ.. వివాహ బంధం ముగిసినప్పటికీ తన విశ్వాసం మాత్రం మారలేదని తెలిపారు.
ఇటీవల బీబీసీ న్యూస్ హిందీకి ఇచ్చిన ఇంటర్వ్యూలో తన ఆధ్యాత్మిక ప్రయాణం గురించి రాఖీ సావంత్ వివరించారు. ఇప్పటివరకు ఎనిమిది సార్లు మక్కా, మదీనాలను సందర్శించి ఉమ్రా పూర్తి చేసినట్లు వెల్లడించారు. రోజుకు ఐదు పూటలా నమాజ్ చేయడంతో పాటు ఖురాన్ పఠిస్తానని, తహజ్జుద్ నమాజ్ కూడా ఆచరిస్తానని చెప్పారు. తన మత విశ్వాసం తనకు మానసిక బలం, రక్షణను ఇస్తోందని పేర్కొన్నారు.
అయితే బాలీవుడ్లో పనిచేయడం, గ్లామరస్ దుస్తులు ధరించడం వంటి కారణాలతో కొందరు తనను నిజమైన ముస్లింగా చూడటం లేదని రాఖీ ఆవేదన వ్యక్తం చేశారు. ఒక వ్యక్తి ముస్లింనా కాదా అనేది బయటివారు నిర్ణయించే విషయం కాదని, అది పూర్తిగా దేవుడికి మరియు వ్యక్తికి మధ్య ఉండే సంబంధమని అన్నారు. తన వృత్తి లేదా దుస్తుల ఆధారంగా ఎవరి మత విశ్వాసాన్నీ అంచనా వేయడం సరికాదని స్పష్టం చేశారు.
