సంగీత దర్శకుడిగా, హీరోగా రాణిస్తున్న జీవీ ప్రకాశ్ కుమార్ నటించిన తాజా క్రైమ్ థ్రిల్లర్ చిత్రం ‘బ్లాక్ మెయిల్’ ఓటీటీ ప్రేక్షకులను అలరించడానికి సిద్ధమవుతోంది. మారన్ దర్శకత్వం వహించిన ఈ తమిళ చిత్రం సెప్టెంబర్ 12న థియేటర్లలో విడుదలైంది. థియేటర్ల వద్ద ఫరవాలేదనిపించుకున్న ఈ సినిమా ఓటీటీ హక్కులను ‘సన్ నెక్స్ట్’ సంస్థ దక్కించుకుంది. ఈ సినిమా ఈ నెల 30వ తేదీ నుంచి ఓటీటీలో స్ట్రీమింగ్ కానున్నట్లు అధికారిక ప్రకటన విడుదలైంది.
ఈ సినిమాలో జీవీ ప్రకాశ్ కుమార్ ‘మణి’ అనే పాత్రలో కనిపిస్తారు. మణి ఒక ఫార్మా కంపెనీలో పనిచేస్తుంటాడు. అయితే, అతనితో పాటు ఆ కంపెనీలో పనిచేసే రేఖ ఇబ్బందుల్లో పడుతుంది. అలాగే, అశోక్ అనే వ్యక్తి కూతురు కిడ్నాప్ చేయబడుతుంది. దీంతో పాటు అర్చన అనే యువతి కూడా ప్రమాదంలో పడుతుంది. ఈ ముగ్గురు వ్యక్తులు బ్లాక్ మెయిల్ బారిన పడి మనశ్శాంతి లేకుండా బ్రతుకుతుంటారు.
ఈ సినిమా కథాంశం ఈ ముగ్గురు వ్యక్తుల జీవితాల్లోని రహస్యాల చుట్టూ, వారిని బ్లాక్ మెయిల్ చేస్తున్నదెవరు అనే ఉత్కంఠభరితమైన అంశాల చుట్టూ తిరుగుతుంది. జీవీ ప్రకాశ్ కుమార్తో పాటు బిందుమాధవి, శ్రీరామ్, తేజు అశ్విని తదితరులు ఈ సినిమాలో ప్రధాన పాత్రలు పోషించారు. థియేటర్లలో మిస్ అయిన క్రైమ్ థ్రిల్లర్ ప్రియులకు ఈ నెల 30 నుంచి ‘బ్లాక్ మెయిల్’ ఓటీటీలో మంచి వీక్షణ అనుభూతిని అందిస్తుందని సినీ వర్గాలు భావిస్తున్నాయి.
