మెగా పవర్ స్టార్ రామ్ చరణ్, దర్శకుడు బుచ్చిబాబు సానా కాంబినేషన్లో తెరకెక్కుతున్న భారీ పాన్ ఇండియా చిత్రం ‘పెద్ది’పై రోజురోజుకీ అంచనాలు పెరుగుతూనే ఉన్నాయి. తాజాగా ఈ సినిమాకు సంబంధించిన ఓ ఆసక్తికరమైన అప్డేట్ సోషల్ మీడియాలో వైరల్గా మారింది. సాధారణంగా స్టార్ హీరోల సినిమాల ఈవెంట్లు హైదరాబాద్, ముంబై వంటి మెట్రో నగరాల్లో జరుగుతుంటాయి. కానీ ‘పెద్ది’ టీమ్ మాత్రం అందరికీ భిన్నంగా ఆలోచించింది.
ఈ సినిమా ట్రైలర్ రిలీజ్ ఈవెంట్ను మధ్యప్రదేశ్ రాజధాని భోపాల్లో నిర్వహించేందుకు ప్లాన్ చేసినట్టు తెలుస్తోంది. ఇందుకు కూడా ఓ ప్రత్యేక కారణం ఉందట. భోపాల్కు ఎన్నో ఏళ్లుగా కుస్తీ సంప్రదాయం ఉంది. అక్కడి ఖాట్లాపురా, గిన్నోరి వంటి అఖాడాలు దేశవ్యాప్తంగా ప్రసిద్ధి చెందాయి. ఇక ‘పెద్ది’ సినిమా కూడా గ్రామీణ నేపథ్యంలో కుస్తీ పోటీల చుట్టూ తిరిగే స్పోర్ట్స్ డ్రామా కావడంతో, కథకు దగ్గరగా ఉండే ప్రాంతాన్నే మూవీ టీమ్ ఎంచుకుందట.
మే 16, 2026న భోపాల్లో గ్రాండ్గా జరగనున్న ఈ ట్రైలర్ లాంచ్ ఈవెంట్కు భారీ స్థాయిలో ఏర్పాట్లు జరుగుతున్నాయి. ముఖ్యంగా ఈ వేడుకలో ఆస్కార్ విజేత ఏఆర్ రెహమాన్ లైవ్ మ్యూజిక్ పెర్ఫార్మెన్స్ ఇవ్వనున్నారనే వార్త అభిమానుల్లో మరింత హైప్ పెంచుతోంది.
ఇప్పటికే విడుదలైన పాటలు సోషల్ మీడియాలో చార్ట్బస్టర్లుగా మారాయి. తెలుగు రాష్ట్రాలతో పాటు దేశవ్యాప్తంగా ఈ సినిమాపై భారీ అంచనాలు నెలకొన్నాయి. ఓవర్సీస్లో కూడా అడ్వాన్స్ బుకింగ్స్ రికార్డు స్థాయిలో జరుగుతున్నాయని సమాచారం. పలుమార్లు వాయిదా పడిన ఈ సినిమా ఎట్టకేలకు జూన్ 4, 2026న ప్రపంచవ్యాప్తంగా విడుదలకు సిద్ధమైంది. ఐటమ్ సాంగ్ షూటింగ్ ఆలస్యం కారణంగానే రిలీజ్ డేట్ మారినట్టు మూవీ వర్గాలు తెలిపాయి.
భారీ బడ్జెట్, స్టార్ క్యాస్ట్, రెహమాన్ సంగీతం, రామ్ చరణ్ మాస్ లుక్… ఇలా అన్ని అంశాలు కలిసి ‘పెద్ది’ని 2026లో అత్యంత భారీ చిత్రాల్లో ఒకటిగా నిలబెడుతున్నాయి.
