పవన్ కళ్యాణ్ ఓజీ ప్రీక్వెల్ రెడీ..! ఈసారి మరింత వైలెంట్‌గా..!

తెలుగు సినిమా ఇండస్ట్రీలో స్టైలిష్ యాక్షన్ గ్యాంగ్‌స్టర్ డ్రామాలకు కొత్త నిర్వచనం తీసుకొచ్చిన చిత్రం ‘OG’. పవర్ స్టార్ పవన్ కళ్యాణ్ హీరోగా దర్శకుడు సుజీత్ తెరకెక్కించిన ఈ సినిమా విడుదలైన తొలి రోజునుంచే సంచలన విజయాన్ని అందుకుంది. థియేటర్లలో అభిమానుల అరుపులు, థమన్ ఇచ్చిన పవర్‌ఫుల్ బ్యాక్‌గ్రౌండ్ స్కోర్, సుజీత్ స్టైలిష్ మేకింగ్ కలిసి ‘OG’ను బాక్సాఫీస్ వద్ద భారీ బ్లాక్‌బస్టర్‌గా నిలిపాయి. ముఖ్యంగా ఓజాస్ గంభీర పాత్రలో పవన్ కళ్యాణ్ కనిపించిన తీరు అభిమానులకు పూర్తి స్థాయి మాస్ ఫీస్ట్ అందించింది.

ఇప్పుడు అందరి దృష్టి ‘OG 2’పైనే నిలిచింది. మొదటి భాగం భారీ విజయానంతరం ఈ కథను మరింత విస్తరించే పనిలో దర్శకుడు సుజీత్ బిజీగా ఉన్నారు. నిజానికి ఆయన హీరో నానితో ‘బ్లడీ రోమియో’ అనే ప్రాజెక్ట్ ప్రారంభించాల్సి ఉన్నా, ఆ సినిమా కొంతకాలం వాయిదా పడినట్లు సమాచారం. దీంతో సుజీత్ తన పూర్తి ఫోకస్‌ను ‘OG 2’ స్క్రిప్ట్‌పైనే పెట్టారని తెలుస్తోంది. ఆసక్తికర విషయం ఏమిటంటే… ఈసారి కథ సీక్వెల్ కాదు, ఓజాస్ గంభీర గతాన్ని చూపించే ప్రీక్వెల్‌గా రాబోతోందట.

మొదటి భాగంలో కేవలం ఓజాస్ గంభీర పవర్ మాత్రమే చూపించిన సుజీత్… ఇప్పుడు అతని ఎదుగుదల వెనుక ఉన్న అసలు కథను తెరపై ఆవిష్కరించేందుకు సిద్ధమవుతున్నారు. ముంబై అండర్‌వ‌రల్డ్‌లో ఓజాస్ ఎలా డాన్‌గా ఎదిగాడు? అతని జీవితాన్ని మార్చిన సంఘటనలు ఏమిటి? అతని ప్రయాణంలో ఎదురైన శత్రువులు ఎవరు? అనే అంశాలను ఈ భాగంలో మరింత లోతుగా చూపించనున్నారట. దీనికోసం పలువురు కొత్త నటీనటులను కూడా రంగంలోకి దింపే ప్లాన్ జరుగుతోందని టాక్.

అంతేకాదు… ఈసారి యాక్షన్ ఎపిసోడ్స్‌ను మరింత భారీ స్థాయిలో ప్లాన్ చేస్తున్నారని సమాచారం. హాలీవుడ్ స్టంట్ మాస్టర్లతో కొన్ని హై వోల్టేజ్ యాక్షన్ సీక్వెన్స్‌లు రూపొందించే అవకాశాలు కనిపిస్తున్నాయి. పవన్ కళ్యాణ్ పాత్రను మరింత ఎమోషనల్‌గా, అదే సమయంలో మరింత డేంజరస్‌గా ప్రెజెంట్ చేయాలని సుజీత్ ప్రత్యేక శ్రద్ధ తీసుకుంటున్నారట.

సాధారణంగా ఒక భారీ హిట్ తర్వాత దర్శకులపై ఒత్తిడి పెరుగుతుంది. కానీ సుజీత్ మాత్రం చాలా క్లారిటీతో ముందుకెళ్తున్నారని సినీ వర్గాలు చెబుతున్నాయి. స్క్రిప్ట్‌లో ప్రతి చిన్న అంశాన్ని జాగ్రత్తగా డిజైన్ చేస్తూ, ‘OG 2’ను మరింత గ్రాండ్‌గా తెరకెక్కించాలనే లక్ష్యంతో పని చేస్తున్నారట. ఇప్పటికే ఇండస్ట్రీలో “OG మొదటి భాగం కేవలం ఆరంభం మాత్రమే… అసలు రచ్చ రెండో భాగంలో ఉంటుంది” అనే టాక్ బలంగా వినిపిస్తోంది.

‘OG’తో బాక్సాఫీస్‌ను షేక్ చేసిన పవన్ కళ్యాణ్ – సుజీత్ కాంబో… ఇప్పుడు ప్రీక్వెల్‌తో మరోసారి సంచలనం సృష్టించేందుకు సిద్ధమవుతోంది. ముంబై బ్యాక్‌డ్రాప్‌లో రానున్న ఈ వైలెంట్ యాక్షన్ డ్రామా కోసం అభిమానులు ఇప్పటినుంచే ఆసక్తిగా ఎదురుచూస్తున్నారు. త్వరలోనే ఈ ప్రాజెక్ట్‌కు సంబంధించిన అధికారిక ప్రకటనలు వెలువడనున్నాయి.