ఈ ఏడాది బాక్సాఫీస్ పరిస్థితి చూస్తుంటే.. “అతి వృష్టి లేకపోతే అనావృష్టి” అన్న సామెత అచ్చం సరిపోతుంది. ఒకసారి సినిమాల కోసం ప్రేక్షకులు ఎదురుచూస్తుంటే.. మరోసారి వరుసగా భారీ సినిమాలు క్యూ కడుతున్నాయి. ఇప్పుడు అదే సీన్ దసరా సీజన్లో కనిపించబోతోంది.
సెప్టెంబర్ చివరి వారం నుంచి అక్టోబర్ మూడో వారం వరకు ఏకంగా నలుగురు స్టార్ హీరోలు తమ సినిమాలతో థియేటర్లపై దండెత్తబోతున్నారు. దీంతో ప్రేక్షకులు కూడా “ఏ సినిమా చూడాలి? ఏది తర్వాత చూడాలి?” అనే కన్ఫ్యూజన్లో పడే అవకాశాలు కనిపిస్తున్నాయి.
సెప్టెంబర్ 25న నాని ‘ప్యారడైజ్’
ఈ దసరా సీజన్కు తెరలేపేది హీరో నాని. ఇప్పటికే పలుమార్లు వాయిదా పడిన ‘ప్యారడైజ్’ సినిమాను ఎట్టి పరిస్థితుల్లోనూ సెప్టెంబర్ 25న విడుదల చేయాలని మేకర్స్ ప్లాన్ చేస్తున్నట్లు ఫిలిం నగర్లో టాక్ వినిపిస్తోంది.
దర్శకుడు శ్రీకాంత్ ఓడెల తెరకెక్కిస్తున్న ఈ రా అండ్ రస్టిక్ యాక్షన్ డ్రామా సికింద్రాబాద్ స్లమ్ బ్యాక్డ్రాప్లో రూపొందుతోంది. ఇదే కాంబినేషన్లో వచ్చిన ‘దసరా’ భారీ విజయం సాధించడంతో.. ఈసారి కూడా నాని మరోసారి మాస్ అవతార్లో బాక్సాఫీస్ను షేక్ చేయాలని చూస్తున్నాడు. పండగ సీజన్లో ఈ సినిమా వస్తే భారీ ఓపెనింగ్స్ రావడం ఖాయమనే అభిప్రాయం వ్యక్తమవుతోంది.
అక్టోబర్ 2న వెంకీ మామ ‘ఆదర్శ కుటుంబం’
నాని తర్వాత రంగంలోకి దిగేది విక్టరీ వెంకటేష్. త్రివిక్రమ్ దర్శకత్వంలో తెరకెక్కుతున్న ‘ఆదర్శ కుటుంబం’ సినిమాను అక్టోబర్ 2న గాంధీ జయంతి సందర్భంగా విడుదల చేయనున్నట్లు ఇప్పటికే అధికారికంగా ప్రకటించారు.
గాంధీ జయంతి లాంగ్ వీకెండ్ ఈ సినిమాకు పెద్ద ప్లస్ కానుంది. పండగ సమయంలో కుటుంబ సమేతంగా థియేటర్లకు వెళ్లే ప్రేక్షకులను లక్ష్యంగా చేసుకుని ఫ్యామిలీ ఎంటర్టైనర్తో వెంకీ మామ ప్రేక్షకుల ముందుకు రానున్నారు.
అక్టోబర్లో అసలైన బాక్సాఫీస్ వార్
అయితే అసలు పోరు మాత్రం అక్టోబర్ రెండో వారంలో మొదలవుతుంది. సూపర్ స్టార్ రజనీకాంత్ నటిస్తున్న ‘జైలర్ 2’ అక్టోబర్ 15న విడుదల కానున్నట్లు ఇప్పటికే ప్రకటించారు.
దీనికి కేవలం ఒక్క రోజు గ్యాప్తో అక్టోబర్ 16న మెగాస్టార్ చిరంజీవి **’విశ్వంభర’**ను విడుదల చేసే అవకాశాలు ఉన్నాయని ప్రచారం జరుగుతోంది. ఒకవేళ ఇదే షెడ్యూల్ ఫిక్స్ అయితే.. రజనీ-చిరు బాక్సాఫీస్ పోరు ఈ ఏడాది అతిపెద్ద హైలైట్గా మారే అవకాశం ఉంది.
ప్రతి సినిమాది ప్రత్యేక జానర్
ఈ నాలుగు సినిమాల్లో మరో ఆసక్తికర విషయం ఏమిటంటే.. ఒక్కో సినిమా ఒక్కో జానర్కు చెందినది.
– నాని – రా అండ్ రస్టిక్ యాక్షన్ డ్రామా
– వెంకటేష్ – ప్యూర్ ఫ్యామిలీ ఎంటర్టైనర్
– రజనీకాంత్ – ఊరమాస్ యాక్షన్ సీక్వెల్
– చిరంజీవి – విజువల్ ఫాంటసీ అడ్వెంచర్
జానర్లు వేర్వేరుగా ఉండటంతో ఒక సినిమా కలెక్షన్లపై మరో సినిమా ప్రభావం కొంత తక్కువగానే ఉండొచ్చని ట్రేడ్ వర్గాలు భావిస్తున్నాయి.
అయితే నెల రోజుల వ్యవధిలో ఇన్ని భారీ సినిమాలు రావడంతో ప్రేక్షకుల ఎంటర్టైన్మెంట్కు కొదవ ఉండదు. కానీ వరుసగా టికెట్లు కొనాల్సి రావడంతో వారి జేబులకు మాత్రం గట్టి భారం పడటం ఖాయమని ట్రేడ్ పండితులు అంచనా వేస్తున్నారు.
మరి ఈ దసరా బాక్సాఫీస్ యుద్ధంలో చివరికి విజేతగా ఎవరు నిలుస్తారు? ఎవరు కలెక్షన్లలో కొత్త రికార్డులు సృష్టిస్తారు? అనేది ఇప్పుడు ఇండస్ట్రీలో హాట్ టాపిక్గా మారింది.
