‘పుష్ప’ సృష్టించిన సంచలనం అంతా ఇంతా కాదు. ఇటు బన్నీ .. అటు సుకుమార్ కెరియర్లో ఈ సినిమా ఒక ప్రత్యేకమైన స్థానంలో నిలిచింది. కథాకథనాల పరంగా .. పాటల పరంగా .. ఫైట్స్ పరంగా ఈ సినిమా ఆడియన్స్ ను విశేషంగా ఆకట్టుకుంది. అలాంటి ఈ సినిమా సీక్వెల్ కోసం అంతా ఆసక్తిగా ఎదురుచూస్తున్నారు. ఈ సినిమా విశేషాలు తెలుసుకోవడానికి కుతూహలాన్ని చూపుతున్నారు.
డిసెంబర్ 6వ తేదీన ఈ సినిమా ప్రపంచవ్యాప్తంగా విడుదల కానుంది. ఆ సమయం కోసం అభిమానులంతా వెయిట్ చేస్తున్నారు. ఇప్పటికే ఈ సినిమా చాలావరకూ చిత్రీకరణ జరుపుకుంది. తదుపరి షెడ్యూల్ రేపటి నుంచి మొదలుకానుంది. హైదరాబాద్ – రామోజీ ఫిల్మ్ సిటీలో కొన్ని కీలకమైన సన్నివేశాలను షూట్ చేయనున్నారు. బన్నీ కూడా ఈ షెడ్యూల్లో పాల్గొననున్నాడు.
‘పుష్ప’ సినిమాను దేవిశ్రీ ప్రసాద్ మ్యూజికల్ హిట్ గా నిలబెట్టాడు. ఆ సినిమాకి మించిన ట్యూన్స్ ను ఆయన ఈ సినిమా కోసం అందించినట్టు చెబుతున్నారు. ఫస్టు పార్టు చివర్లో ఫహాద్ ఫాజిల్ ఎంట్రీ ఇచ్చిన సంగతి తెలిసిందే. అందువలన సెకండ్ పార్టులో ఆయన జోరు కొనసాగుతుందని అంటున్నారు. సునీల్ .. అనసూయ .. రావు రమేశ్ పాత్రలు తమ హవాను కొనసాగించనున్నాయి.
