ఆడియెన్స్ బిగ్ రిలీఫ్..! థియేటర్ టికెట్ ధరలపై తెలంగాణ సర్కార్ కీలక నిర్ణయం..!

ఒకప్పుడు భారీ బడ్జెట్ సినిమా రిలీజ్ అవుతుందంటే చాలు.. ప్రీమియర్ షో టికెట్ల ధరలు ఆకాశాన్ని తాకేవి. స్టార్ హీరోల సినిమాలకు ఫ్యాన్స్ ఎంత రేటు పెట్టినా టికెట్లు కొనడానికి వెనుకాడేవారు కాదు. కొన్ని సందర్భాల్లో టికెట్ ధరలు ఏకంగా వందల రూపాయలకు చేరుకునేవి.

అయితే ఇకపై తెలంగాణలో అలాంటి పరిస్థితులకు చెక్ పడనుంది. థియేటర్లలో టికెట్ ధరలకు సంబంధించి ప్రభుత్వం కొత్తగా గరిష్ఠ పరిమితులను నిర్ణయించింది. సింగిల్ స్క్రీన్ నుంచి మల్టీప్లెక్స్ వరకు.. ఏ కేటగిరీ టికెట్ ఎంత ధరకు అమ్మాలో స్పష్టంగా రేట్లు ఫిక్స్ చేసింది.

ఏ కేటగిరీకి ఎంత ధర?

ప్రభుత్వం జారీ చేసిన ఉత్తర్వుల ప్రకారం.. నాన్-ఏసీ థియేటర్లలో నాన్-ప్రీమియం సీట్ల టికెట్ ధర కనిష్ఠంగా రూ.30, గరిష్ఠంగా రూ.70గా నిర్ణయించారు. అదే ప్రీమియం సీట్ల విషయానికి వస్తే రూ.50 నుంచి రూ.100 వరకు ధర ఉండనుంది.

ఏసీ థియేటర్లలో నాన్-ప్రీమియం టికెట్ ధర రూ.50 నుంచి గరిష్ఠంగా రూ.150 వరకు ఉండొచ్చు. ప్రీమియం సీట్లకు మాత్రం కనిష్ఠంగా రూ.100, గరిష్ఠంగా రూ.200గా నిర్ణయించారు.

ఇక స్పెషల్ థియేటర్లు, మల్టీప్లెక్స్‌లలో నాన్-ప్రీమియం కేటగిరీ టికెట్ ధర రూ.100 నుంచి గరిష్ఠంగా రూ.250 వరకు ఉండేలా ప్రభుత్వం నిర్ణయం తీసుకుంది.

ఒక్క రూపాయి ఎక్కువ వసూలు చేసినా చర్యలు!

ఇక్కడే అసలు ట్విస్ట్ ఉంది. ప్రభుత్వం నిర్ణయించిన ధరల కంటే ఒక్క రూపాయి ఎక్కువగా వసూలు చేసినా చర్యలు తప్పవని స్పష్టం చేసినట్లు తెలుస్తోంది.

గతంలో భారీ సినిమాల రిలీజ్ సమయంలో నిర్మాతలు ప్రభుత్వం లేదా కోర్టులను ఆశ్రయించి.. మొదటి వారం టికెట్ రేట్లు పెంచుకోవడంతో పాటు అర్ధరాత్రి ప్రీమియర్ షోలు, అదనపు షోలకు అనుమతులు పొందేవారు. కొన్ని సినిమాలకు టికెట్ ధరలు రూ.300 నుంచి రూ.500 వరకు కూడా వెళ్లిన సందర్భాలు ఉన్నాయి.

కానీ ఇప్పుడు ప్రభుత్వం తీసుకున్న ఈ నిర్ణయం అమల్లోకి వస్తే.. ఆ తరహా భారీ ధరలకు బ్రేక్ పడే అవకాశం ఉంది.

ఆడియన్స్‌కు రిలీఫ్.. నిర్మాతలకు షాక్?

ఓటీటీ ప్లాట్‌ఫామ్స్ పెరుగుతున్న సమయంలో.. టికెట్ ధరలు కూడా భారీగా పెరగడంతో చాలామంది ప్రేక్షకులు థియేటర్లకు దూరమవుతున్నారు. ముఖ్యంగా కుటుంబంతో సినిమా చూడాలంటే ఖర్చు ఎక్కువవుతోంది.

ఈ నేపథ్యంలో ప్రభుత్వం నిర్ణయించిన ధరలు సాధారణ ప్రేక్షకులకు మాత్రం రిలీఫ్ ఇచ్చే అవకాశం ఉంది. ముఖ్యంగా ఫ్యామిలీ ఆడియన్స్ తక్కువ ఖర్చుతో థియేటర్‌లో సినిమా చూసే అవకాశం ఉంటుంది.

అయితే మరోవైపు వందల కోట్ల బడ్జెట్‌తో సినిమాలు తెరకెక్కిస్తున్న నిర్మాతలకు మాత్రం ఇది పెద్ద సవాలుగా మారే అవకాశం ఉంది. భారీ బడ్జెట్ సినిమాలు మొదటి వారంలోనే ఎక్కువ కలెక్షన్లు రాబట్టుకోవాలని చూస్తాయి. అలాంటి సమయంలో టికెట్ రేట్లపై పరిమితులు విధిస్తే బాక్సాఫీస్ లెక్కలు ఎలా మారతాయన్నది ఆసక్తికరంగా మారింది.

మొత్తానికి తెలంగాణలో సినిమా టికెట్ రేట్లపై ప్రభుత్వం తీసుకున్న ఈ నిర్ణయం ప్రేక్షకులకు ఊరట ఇస్తుందా? లేక భారీ బడ్జెట్ సినిమాల కలెక్షన్లపై ప్రభావం చూపుతుందా? అనేది ఇప్పుడు ఇండస్ట్రీలో హాట్ టాపిక్‌గా మారింది.