తమిళ స్టార్ హీరో సూర్య, ‘ప్రేమలు’ ఫేమ్ మమితా బైజు జంటగా నటిస్తున్న ‘విశ్వనాథ్ అండ్ సన్స్’ చిత్రంపై ప్రేక్షకుల్లో భారీ అంచనాలు నెలకొన్నాయి. ‘లక్కీ భాస్కర్’ తర్వాత దర్శకుడు వెంకీ అట్లూరి తెరకెక్కించిన ఈ సినిమా ఆగస్టు 14న ప్రపంచవ్యాప్తంగా విడుదల కానుంది. ఇప్పటికే టీజర్, పాటలతో మంచి బజ్ సొంతం చేసుకున్న ఈ చిత్రం, తాజాగా విడుదలైన థియేట్రికల్ ట్రైలర్తో మరింత ఆసక్తిని పెంచింది.
ట్రైలర్లో సూర్య కొత్త లుక్, ఆయన స్క్రీన్ ప్రెజెన్స్ ప్రధాన ఆకర్షణగా నిలిచాయి. ఈ చిత్రంలో ‘సంజయ్ విశ్వనాథ్’ అనే ప్రొఫెషనల్ షూటర్ పాత్రలో సూర్య స్టైలిష్గా కనిపించగా, మమితా బైజుతో ఆయన కెమిస్ట్రీ ప్రేక్షకులను ఆకట్టుకుంటోంది. ఇప్పటివరకు చేయని తరహా పాత్రలో సూర్య కనిపించడం అభిమానుల్లో మరింత ఆసక్తిని రేకెత్తిస్తోంది.
కథలో తనకంటే వయసులో చిన్నదైన యువతి జీవితంలోకి రావడం, ఆమె తనపై చూపే అభిమానం, వారిద్దరి మధ్య ఏర్పడే భావోద్వేగ బంధాన్ని దర్శకుడు వెంకీ అట్లూరి హృద్యంగా చూపించినట్లు ట్రైలర్ సూచిస్తోంది. ఏజ్ గ్యాప్ లవ్ స్టోరీకి ఎమోషన్స్, విజువల్స్, సంగీతాన్ని జోడించి రూపొందించిన ఈ చిత్రం బాక్సాఫీస్ వద్ద ఎలాంటి విజయాన్ని అందుకుంటుందో చూడాలి.
