నటి ఆదా శర్మ ఇండస్ట్రీలో డేట్స్ సర్దుబాటు విషయంలో తనకు ఎదురైన ఒక ఇబ్బందికర సంఘటనను వెల్లడించారు. ఒకే సమయంలో మూడు సినిమాలకు అంగీకరించిన తనకు, మొదటి సినిమా నిర్మాత వల్ల తీవ్ర మనస్తాపం కలిగిందని ఆమె పేర్కొన్నారు. ఆ నిర్మాత తన మేనేజర్ను అసభ్య పదజాలంతో దూషించడమే కాకుండా, పట్టుబట్టి అడిగిన తేదీలను ఇచ్చిన తర్వాత షూటింగ్ క్యాన్సిల్ చేశారని ఆదా వాపోయారు. దీనివల్ల తాను ఆర్థికంగా, మానసికగా దెబ్బతినడమే కాకుండా, నెల రోజుల పాటు ఎలాంటి పని లేకుండా ఇంటికే పరిమితమవ్వాల్సి వచ్చిందని ఆవేదన వ్యక్తం చేశారు.
ఈ గందరగోళం మధ్య మిగతా ఇద్దరు నిర్మాతలు మరియు దర్శకులు ఎంతో హుందాగా వ్యవహరించారని ఆదా ప్రశంసించారు. వారు తన కోసం ఇతర నటీనటుల డేట్స్ను కూడా అడ్జస్ట్ చేశారని, పరిశ్రమలో చెడ్డవారితో పాటు మంచివారు కూడా ఉంటారని చెప్పడానికే ఈ విషయాన్ని పంచుకుంటున్నానని ఆమె తెలిపారు. అయితే అందరూ సర్దుబాటు చేసుకున్న తర్వాత, మొదటి నిర్మాత షూటింగ్ వద్దని చెప్పడం తనను తీవ్రంగా కలచివేసిందని ఆమె ఇన్స్టాగ్రామ్ వీడియోలో వివరించారు.
ఇదే సమయంలో ‘ది కేరళ స్టోరీ’ సీక్వెల్లో తాను ఎందుకు నటించడం లేదనే విషయంపై కూడా ఆదా క్లారిటీ ఇచ్చారు. తను భాగం కాని సినిమా గురించి ఎక్కువగా మాట్లాడటం సరికాదని ఆమె అభిప్రాయపడ్డారు. మొదటి భాగం ఆఫ్ఘనిస్తాన్లోని ఐసిస్ క్యాంపుల నేపథ్యంలో సాగితే, రెండో భాగం కథాంశం పూర్తిగా భిన్నంగా ఉంటుందని ఆమె వెల్లడించారు. తనకు అవకాశం వచ్చిందా లేదా అన్నది మేకర్స్ మరియు తన మధ్య ఉండాల్సిన వ్యక్తిగత విషయమని స్పష్టం చేశారు.
