మెగాస్టార్ చిరంజీవి కథానాయకుడిగా, మాస్ డైరెక్టర్ అనిల్ రావిపూడి దర్శకత్వంలో తెరకెక్కిన ఫ్యామిలీ ఎంటర్టైనర్ ‘మన శంకర వరప్రసాద్ గారు’ ఇప్పుడు డిజిటల్ సందడికి సిద్ధమైంది. ఈ ఏడాది సంక్రాంతి కానుకగా జనవరి 12న థియేటర్లలో విడుదలైన ఈ చిత్రం బాక్సాఫీస్ వద్ద ఘనవిజయం సాధించింది. తాజా సమాచారం ప్రకారం, ప్రముఖ ఓటీటీ సంస్థ జీ5 (ZEE5) ఈ సినిమా డిజిటల్ స్ట్రీమింగ్ హక్కులను సొంతం చేసుకుంది.
ఈ భారీ విజయాన్ని అందుకున్న చిత్రాన్ని ఫిబ్రవరి 11 నుంచి స్ట్రీమింగ్ చేయనున్నట్లు అధికారిక ప్రకటన వెలువడింది. కేవలం తెలుగులోనే కాకుండా తమిళం, కన్నడ, మలయాళం, హిందీతో పాటు మరాఠీ, బెంగాలీ వంటి మొత్తం 7 భాషల్లో ఈ సినిమా అందుబాటులోకి రానుంది. దీనివల్ల దేశవ్యాప్తంగా ఉన్న మెగా అభిమానులు తమ సొంత భాషల్లో ఈ వినోదాన్ని ఆస్వాదించే అవకాశం లభించింది.
థియేటర్లలో విడుదలైన కేవలం ఆరు రోజుల్లోనే బ్రేక్ ఈవెన్ సాధించి నిర్మాతలకు కాసుల వర్షం కురిపించిన ఈ సినిమా, ఓటీటీలో కూడా రికార్డు వ్యూస్ సాధిస్తుందని చిత్ర యూనిట్ ధీమా వ్యక్తం చేస్తోంది. సంక్రాంతి మిస్ అయిన వారు లేదా మళ్ళీ చూడాలనుకునే వారు వచ్చే వారం నుంచి జీ5లో ఈ మెగా ఎంటర్టైనర్ను వీక్షించవచ్చు.
