ఆంధ్రప్రదేశ్ ఉప ముఖ్యమంత్రి పవన్ కళ్యాణ్ తన సతీమణి అన్నా లెజినోవాతో కలిసి మహారాష్ట్రలోని నాందేడ్ గురుద్వారాను సందర్శించడం రాజకీయ వర్గాల్లో చర్చనీయాంశమైంది. శ్రీ గురు తేగ్ బహదూర్ షాహిది సమాగమంలో పాల్గొన్న పవన్, సిక్కు సంప్రదాయ తలపాగా ధరించి ప్రత్యేక ప్రార్థనలు నిర్వహించారు. దీనికి సంబంధించిన ఫోటోలను జనసేన పార్టీ సోషల్ మీడియాలో పంచుకోగా, అవి కాస్తా వైరల్ అయ్యాయి. అయితే, ఈ ఫోటోలపై నటి పూనమ్ కౌర్ స్పందిస్తూ పరోక్షంగా మరియు ప్రత్యక్షంగా షాకింగ్ కామెంట్స్ చేశారు.
పూనమ్ కౌర్ తన ట్వీట్లో పవన్ పేరు ప్రస్తావించకుండానే తీవ్ర విమర్శలు గుప్పించారు. “తమ వారసత్వాలను మార్చుకుని, దుర్గుణాలను వదిలించుకోని వ్యక్తులు గురువుల పట్ల గౌరవం చూపలేరని” పేర్కొన్నారు. దేశం మరియు ధర్మం కోసం సర్వస్వం త్యాగం చేసిన గురు తేగ్ బహదూర్ జీని ప్రార్థించే హక్కు ఇలాంటి వారికి లేదని, ధరించిన దుస్తులు మరియు నకిలీ చిరునవ్వులు అధర్మాన్ని కప్పిపుచ్చలేవని ఆమె ఘాటుగా వ్యాఖ్యానించారు. ఈ పోస్ట్లు ఇప్పుడు సోషల్ మీడియాలో పెద్ద దుమారాన్నే రేపుతున్నాయి.
మరోవైపు, పవన్ కళ్యాణ్ను హిందూత్వ ధర్మ రక్షకుడిగా అభివర్ణించిన ఒక నెటిజన్ పోస్ట్కు కూడా పూనమ్ కౌర్ గట్టి కౌంటర్ ఇచ్చారు. పవన్ కళ్యాణ్ను ‘మతమార్పిడులకు బ్రాండ్ అంబాసిడర్’ అని సంబోధిస్తూ, తన వారసత్వాన్ని క్యాథలిక్ క్రైస్తవ మతంలోకి మార్చుకున్న వ్యక్తికి హిందూత్వ గురించి మాట్లాడే అర్హత లేదని విమర్శించారు. పూనమ్ చేసిన ఈ వ్యాఖ్యలపై జనసేన మద్దతుదారులు మరియు నెటిజన్ల నుంచి భిన్నమైన ప్రతిస్పందనలు వ్యక్తమవుతున్నాయి, కొందరు ఆమెను సమర్థిస్తుండగా మరికొందరు కౌంటర్లు ఇస్తున్నారు.
