క్రిస్మస్ కానుకగా విడుదలైన ‘దండోరా’ సినిమా మంచి విజయాన్ని అందుకున్న సందర్భంగా ఏర్పాటు చేసిన సక్సెస్ మీట్లో శివాజీ మాట్లాడారు. తన వ్యక్తిగత విషయాల వల్ల సినిమాపై ప్రభావం పడకూడదని ఆయన కోరారు. “దయచేసి నా వ్యక్తిగత విషయాలను పక్కన పెట్టండి.. ఈ సినిమాను నిలబెట్టండి. ఎంతో కష్టపడి సినిమా తీసిన నిర్మాత రవీంద్ర బెనర్జీ ముప్పానేని నష్టపోకూడదు. ఆయన మరెన్నో మంచి సినిమాలు తీసే సత్తా ఉన్న వ్యక్తి,” అని శివాజీ పేర్కొన్నారు. సినిమా కోసం తాను పడిన కష్టాన్ని వివరిస్తూ, తన పాత్ర నిద్రలేమితో ఉబ్బినట్లు కనిపించడం కోసం రోజుకు కేవలం రెండు గంటలు మాత్రమే నిద్రపోయేవాడినని వెల్లడించారు.
మురళీకాంత్ దర్శకత్వంలో వచ్చిన ఈ సినిమా గురించి 2026 సంవత్సరం మొత్తం మాట్లాడుకుంటారని శివాజీ ధీమా వ్యక్తం చేశారు. సెన్సార్ ఆలస్యం కావడం వల్ల రెండు రోజులు ముందు ప్రీమియర్స్ పడలేదని, లేదంటే ఈ సినిమా రేంజ్ మరోలా ఉండేదని ఆయన అభిప్రాయపడ్డారు. ప్రస్తుతం నార్త్ అమెరికాలో ఈ చిత్రానికి ఆదరణ పెరుగుతోందని, షోల సంఖ్య కూడా పెరిగిందని సంతోషం వ్యక్తం చేశారు. ఒక సినిమా నచ్చితే దానిని భుజాన వేసుకునే మీడియా మిత్రులు, ఈ సినిమాను కూడా మరింత మందికి చేరువ చేయాలని విజ్ఞప్తి చేశారు.
ఈ సినిమాలో శివాజీతో పాటు నవదీప్, బిందు మాధవి, నందు, రవికృష్ణ వంటి నటులు ప్రాణం పెట్టి పనిచేశారని ఆయన కొనియాడారు. “సినిమా నాకు అన్నం పెట్టింది, గౌరవాన్ని ఇచ్చింది.. అందుకే సినిమా కోసం ప్రాణమైనా పెడతాను,” అని ఆయన ఎమోషనల్ అయ్యారు. ‘హనుమాన్’ సినిమా నిర్మాత ఈ చిత్రాన్ని చూసి డిస్ట్రిబ్యూట్ చేయడం గొప్ప విషయమని గుర్తు చేస్తూ, కొత్త తరం ప్రతిభావంతులైన నటులకు ఈ సినిమా ఒక నిదర్శనంగా నిలుస్తుందని శివాజీ ఉద్ఘాటించారు.
