ప్రపంచవ్యాప్తంగా అపారమైన ఆదరణ పొందిన హాలీవుడ్ దర్శకుడు జేమ్స్ కామెరూన్ ‘అవతార్’ ఫ్రాంచైజీలోని మూడో భాగం, ‘అవతార్: ఫైర్ అండ్ యాష్’ డిసెంబర్ 19న విడుదల కానుంది. తొలి రెండు భాగాలు రికార్డు వసూళ్లు సాధించగా, ఈ మూడో సినిమాపై కూడా భారీ అంచనాలు నెలకొన్నాయి. ఈ చిత్రంలో పండోరా ప్రపంచంలో కొత్త కోణం, సరికొత్త విలన్ (వరాంగ్), మరింత భారీ విజువల్స్ను చూపించబోతున్నట్లు సమాచారం. సినిమా విడుదల దగ్గర పడుతుండటంతో, కేవలం ప్రమోషన్లకే పరిమితం కాకుండా, సినిమాను అత్యున్నత ప్రమాణాలతో ప్రేక్షకులకు అందించడం కోసం కామెరూన్ థియేటర్ల నిర్వహణపై ప్రత్యేక దృష్టి సారించారు.
దీనిలో భాగంగా, జేమ్స్ కామెరూన్ థియేటర్ టెక్నీషియన్లకు, యజమానులకు ఒక ప్రత్యేక లేఖ రాశారు. ఈ లేఖలో ‘అవతార్: ఫైర్ అండ్ యాష్’ DCPతో పాటు పంపిన ప్రొజెక్షన్ స్పెసిఫికేషన్ ఫైల్, ఫ్రేమింగ్ చార్ట్ను తప్పకుండా పాటించాలని స్పష్టం చేశారు. ముఖ్యంగా, లైట్ లెవల్స్, సరైన ఫ్రేమింగ్, మరియు ఆడియో కాన్ఫిగరేషన్ విషయంలో ఎటువంటి రాజీ పడకూడదని ఆయన సూచించారు. సరైన నిర్వహణ ప్రేక్షకుల అనుభూతిలో కీలక పాత్ర పోషిస్తుందని ఆయన నొక్కి చెప్పారు.
ఈ సినిమా సౌండ్ మిక్సింగ్ను తానే వ్యక్తిగతంగా పర్యవేక్షించానని జేమ్స్ కామెరూన్ వెల్లడించారు. సినిమాలోని నిశ్శబ్ద సన్నివేశాల నుంచి భారీ యాక్షన్ సీన్స్ వరకు పూర్తి డైనమిక్స్ను ప్రేక్షకులు అనుభవించాలంటే, 7.0 రిఫరెన్స్ సౌండ్ లెవల్ను ఎట్టి పరిస్థితుల్లోనూ తగ్గించవద్దని ఆయన గట్టిగా హెచ్చరించారు. థియేటర్లలో స్పీకర్లు దెబ్బతినడం వంటి సంఘటనల దృష్ట్యా, సినిమా అనుభూతి దెబ్బతినకుండా ముందు జాగ్రత్తగా ఈ సూచనలు చేస్తున్నట్లు తెలుస్తోంది. ప్రేక్షకులు సినిమాను ఆస్వాదించడంలో టెక్నీషియన్ల పాత్రే అత్యంత ముఖ్యమైనదని పేర్కొంటూ, వారి అంకితభావానికి ధన్యవాదాలు తెలిపారు.
