దిగ్గజ దర్శకుడు ఎస్.ఎస్. రాజమౌళి ఇటీవల ఒక ఈవెంట్లో దేవుడిపై నమ్మకం లేదంటూ చేసిన వ్యాఖ్యలు తీవ్ర వివాదానికి దారితీశాయి. రాజమౌళి క్షమాపణలు చెప్పాలని పలు హిందూ సంఘాలు, బీజేపీ నేతలు డిమాండ్ చేస్తుండగా, ఈ వివాదంపై దర్శకుడు రామ్ గోపాల్ వర్మ (RGV) రంగంలోకి దిగారు. రాజమౌళికి మద్దతుగా పోస్ట్ పెడుతూ, విమర్శకులకు గట్టి కౌంటర్ ఇచ్చారు. భారతదేశంలో నాస్తికుడిగా (Atheist) ఉండటం నేరం కాదని, భారత రాజ్యాంగంలోని ఆర్టికల్ 25 దేవుడిని విశ్వసించకపోవడాన్ని కూడా రక్షిస్తుందని ఆయన స్పష్టం చేశారు.
రాజమౌళిపై విషం కక్కుతున్న వారికి ఆర్జీవీ గట్టిగా జవాబిస్తూ, దేవుడిపై నమ్మకం లేకపోతే సినిమాల్లో దేవుడిని ఎందుకు చూపిస్తున్నారనేది మూర్ఖపు వాదన అని కొట్టిపారేశారు. “ఆ లెక్కన, గ్యాంగ్స్టర్ సినిమా తీయాలంటే దర్శకుడు గ్యాంగ్స్టర్గా మారాలా? హారర్ సినిమా కోసం దెయ్యంగా మారాలా?” అని ఆయన ప్రశ్నించారు. అంతేకాకుండా, దేవుడిని నమ్మని రాజమౌళికి, దేవుడిని నమ్మే చాలా మందికి దక్కనంత విజయం, సంపద దక్కాయని, దీనిని బట్టి చూస్తే దేవుడు నాస్తికులనే ఎక్కువగా ప్రేమిస్తున్నాడేమో అని వ్యంగ్యంగా వ్యాఖ్యానించారు.
చివరగా, రాజమౌళితో దేవుడికే సమస్య లేనప్పుడు, ఈ స్వయం ప్రకటిత ధర్మ రక్షకులు (God Mongers) ఎందుకు బీపీ, అల్సర్ తెచ్చుకుంటున్నారని ఆర్జీవీ ప్రశ్నించారు. దేవుడిని రక్షించడం మానేయాలని, అది దేవుడిని అవమానించినట్లేనని అన్నారు. రాజమౌళి నాస్తికుడైనంత మాత్రాన దేవుడి శక్తి తగ్గదని, “దేవుడు బాగానే ఉన్నాడు. రాజమౌళి బాగానే ఉన్నాడు. వీరిద్దరినీ అర్థం చేసుకోలేని వారు మాత్రమే బాధపడుతున్నారు” అంటూ తన వ్యాఖ్యలను ముగించారు.
