పాన్ ఇండియా స్టార్ ప్రభాస్ నటిస్తున్న తాజా చిత్రం ‘ది రాజా సాబ్’ నుంచి అభిమానులు ఎంతో ఆసక్తిగా ఎదురుచూస్తున్న కీలక అప్డేట్ వచ్చేసింది. దర్శకుడు మారుతి రూపొందిస్తున్న ఈ సినిమా నుంచి మొదటి పాట విడుదల తేదీని చిత్రబృందం అధికారికంగా ప్రకటించింది. ఈ ఫస్ట్ సింగిల్ నవంబర్ 23న విడుదల కానుంది. దీనికి సంబంధించిన ప్రత్యేక పోస్టర్ను మేకర్స్ సోషల్ మీడియాలో పంచుకున్నారు.
“విజిల్స్ వేయించే ట్రీట్ తీసుకువస్తున్నాం… ‘రెబెల్ సాబ్’ గీతం ఈ నెల 23న వస్తోంది” అంటూ చిత్రబృందం చేసిన ఈ ప్రకటనతో సినిమాపై అంచనాలు మరింత పెరిగాయి. ఈ చిత్రానికి ప్రముఖ సంగీత దర్శకుడు తమన్ సంగీతం అందిస్తుండటంతో, ప్రభాస్ సినిమాకు ఆయన అందించే సంగీతం ఏ స్థాయిలో ఉంటుందోనని అభిమానులు ఉత్సాహంగా ఎదురుచూస్తున్నారు. ఈ పాట విడుదలతో ‘ది రాజా సాబ్’ సినిమా ప్రమోషన్లు అధికారికంగా ప్రారంభం కానున్నాయి.
పీపుల్ మీడియా ఫ్యాక్టరీ పతాకంపై టీజీ విశ్వప్రసాద్ నిర్మిస్తున్న ఈ చిత్రంలో బాలీవుడ్ నటుడు సంజయ్ దత్, నిధి అగర్వాల్, రిద్ధి కుమార్, బోమన్ ఇరానీ వంటి కీలక నటీనటులు పాలుపంచుకుంటున్నారు. ఇప్పటికే విడుదలైన ఫస్ట్ లుక్ పోస్టర్కు అద్భుతమైన స్పందన లభించింది. ఈ సినిమాను సంక్రాంతి కానుకగా జనవరి 9న ప్రపంచవ్యాప్తంగా థియేటర్లలోకి తీసుకురానున్నట్లు చిత్ర యూనిట్ స్పష్టం చేసింది.
