దీపావళి పండుగ సందర్భంగా భారీ అంచనాలతో విడుదలైన సిద్ధూ జొన్నలగడ్డ తాజా చిత్రం **’తెలుసు కదా’**కు మిక్స్డ్ రివ్యూలు వచ్చాయి. సినిమాకు రిలీజ్కు ముందు మంచి హైప్ ఉన్నప్పటికీ, పండుగ సీజన్లో కూడా బాక్సాఫీస్ వద్ద అనుకున్న స్థాయిలో భారీ ఓపెనింగ్స్ సాధించలేకపోయింది. తొలి రోజు కేవలం రూ.3.5 కోట్ల రేంజ్లో మాత్రమే గ్రాస్ కలెక్షన్లు సాధించింది. టాక్ కూడా అద్భుతంగా లేకపోవడంతో రోజు రోజుకు ఈ సినిమా కలెక్షన్లు తగ్గుతూ వచ్చాయి. ఈ సినిమా వీకెండ్లో పర్వాలేదనిపించినా, వీక్ డేస్లో మాత్రం చాలా బలహీనపడింది.
రాశీ ఖన్నా, శ్రీనిధి శెట్టి హీరోయిన్లుగా నటించిన ఈ సినిమాకు నీరజ కోన దర్శకురాలిగా పరిచయమైంది. ఇప్పటివరకు ఈ సినిమా రెండు తెలుగు రాష్ట్రాలతో పాటు ప్రపంచ వ్యాప్తంగా కలిపి రూ.12 కోట్లకు పైగా గ్రాస్ను (రూ.7 కోట్ల వరకు షేర్ను) మాత్రమే సాధించింది. ఈ సినిమా థియేట్రికల్ బిజినెస్ రూ.19.5 కోట్ల వరకు జరగగా, బ్రేక్ ఈవెన్ కోసం రూ.20 కోట్లు కలెక్ట్ చేయాల్సి ఉంది. అంటే, క్లీన్ హిట్గా నిలవాలంటే ఈ సినిమా ఇంకా రూ.14 కోట్ల వసూళ్లు సాధించాల్సి ఉంటుంది.
సినిమా కథ విషయానికొస్తే, అనాథగా పెరిగిన వరుణ్ (సిద్ధూ జొన్నలగడ్డ)కు తనకంటూ ఒక కుటుంబం ఉండాలనేది ప్రధాన కోరిక. భార్య అంజలి (రాశి ఖన్నా) పిల్లలను కనలేదని తేలడంతో, ఆ దంపతుల జీవితంలోకి వరుణ్ మాజీ ప్రేయసి రాగా (శ్రీనిధి శెట్టి) సరోగసీ కోసం సరోగేట్గా ఎంట్రీ ఇస్తుంది. ఈ త్రికోణ ప్రేమ, బాధ, త్యాగం నిండిన కాంప్లికేటెడ్ సబ్జెక్ట్ను దర్శకురాలు ఎంచుకున్నప్పటికీ, దానిని స్క్రీన్పై చూపించే విధానంలో కొంత తడబాటు కనిపించిందని, చాలా మందికి ఇది లాజిక్ లెస్గా అనిపించిందని రివ్యూలలో పేర్కొన్నారు.
