పవర్ స్టార్ పవన్ కల్యాణ్, దర్శకుడు హరీశ్ శంకర్ కాంబినేషన్లో వస్తున్న హై-వోల్టేజ్ యాక్షన్ ఎంటర్టైనర్ ‘ఉస్తాద్ భగత్ సింగ్’ విడుదలకు ముహూర్తం ఖరారైంది. తాజాగా ఈ చిత్రం సెన్సార్ కార్యక్రమాలను విజయవంతంగా పూర్తి చేసుకుంది. సెంట్రల్ బోర్డ్ ఆఫ్ ఫిల్మ్ సర్టిఫికేషన్ (CBFC) ఈ సినిమాకు U/A సర్టిఫికేట్ జారీ చేసింది. ఈ విషయాన్ని చిత్ర నిర్మాణ సంస్థ మైత్రీ మూవీ మేకర్స్ ఒక పవర్ఫుల్ పోస్టర్ ద్వారా అధికారికంగా ధ్రువీకరించింది.
ఈ సినిమా విడుదల తేదీలో ఒక కీలక మార్పు చోటుచేసుకుంది. తొలుత మార్చి 26న విడుదల చేయాలని భావించినప్పటికీ, యశ్ నటించిన ‘టాక్సిక్’ సినిమా వాయిదా పడటంతో ఆ స్లాట్ను ఈ చిత్రం దక్కించుకుంది. దీంతో ఉగాది పండుగను పురస్కరించుకుని మార్చి 19న ఈ సినిమాను ప్రపంచవ్యాప్తంగా విడుదల చేయనున్నారు. ప్రేక్షకులను ఉర్రూతలూగించే ఈ యాక్షన్ డ్రామా రన్టైమ్ను కూడా 2 గంటల 29 నిమిషాలుగా ఖరారు చేశారు. క్రిస్పీ రన్టైమ్ సినిమాకు ప్లస్ అవుతుందని ట్రేడ్ వర్గాలు భావిస్తున్నాయి.
మైత్రీ మూవీ మేకర్స్ పతాకంపై నవీన్ యెర్నేని, వై. రవిశంకర్ నిర్మిస్తున్న ఈ చిత్రంలో శ్రీలీల కథానాయికగా నటిస్తోంది. దేవి శ్రీ ప్రసాద్ పాటలు స్వరపరచగా, ఎస్.ఎస్. తమన్ నేపథ్య సంగీతం అందిస్తున్నారు. ‘గబ్బర్ సింగ్’ వంటి బ్లాక్ బస్టర్ తర్వాత పవన్-హరీశ్ కాంబినేషన్లో వస్తున్న సినిమా కావడంతో అంచనాలు ఆకాశాన్ని తాకుతున్నాయి. ఇప్పటికే విడుదలైన టీజర్, పాటలు సోషల్ మీడియాలో ట్రెండ్ అవుతుండగా, మార్చి 19న థియేటర్లలో పవర్ స్టార్ పూనకాలు ఖాయమని అభిమానులు ధీమా వ్యక్తం చేస్తున్నారు.
