పవర్ స్టార్ పవన్ కల్యాణ్ హీరోగా, దర్శకుడు హరీశ్ శంకర్ ప్రతిష్టాత్మకంగా తెరకెక్కిస్తున్న చిత్రం ‘ఉస్తాద్ భగత్ సింగ్’. ఈ భారీ యాక్షన్ ఎంటర్టైనర్లో కీలక పాత్ర పోషిస్తున్న నటి రాశీ ఖన్నా, తాజాగా షూటింగ్ సెట్స్ నుంచి కొన్ని ఆసక్తికరమైన బిహైండ్ ది సీన్స్ (BTS) వీడియోలను సోషల్ మీడియాలో పంచుకున్నారు. ఈ వీడియోలతో పాటు “యాక్షన్ మరియు కట్ మధ్య నిశ్శబ్దం ఉంటుంది.. కొన్నిసార్లు నవ్వులు కూడా ఉంటాయి” అంటూ షూటింగ్ సమయంలోని ఆహ్లాదకర వాతావరణాన్ని ఆమె వివరించారు.
పవన్ కల్యాణ్తో కలిసి పనిచేయడం పట్ల రాశీ ఖన్నా తన సంతోషాన్ని వ్యక్తం చేశారు. ఆయనతో కలిసి నటించడాన్ని ఒక గొప్ప గౌరవంగా భావిస్తున్నానని, ఈ సినిమా తనకు ఎప్పటికీ గుర్తుండిపోయే మధుర జ్ఞాపకం అని ఆమె పేర్కొన్నారు. గతంలో పవన్ కల్యాణ్తో దిగిన సెల్ఫీని షేర్ చేస్తూ ఆయనపై ఉన్న అభిమానాన్ని చాటుకున్న రాశీ, ఈ చిత్రంలో ‘శ్లోక’ అనే పవర్ఫుల్ పాత్రలో కనిపించబోతున్నారు. హరీశ్ శంకర్ దర్శకత్వంలో ఆమెకు ఇది మూడవ సినిమా కాగా, పవన్తో ఇదే మొదటి కాంబినేషన్.
మైత్రీ మూవీ మేకర్స్ నిర్మిస్తున్న ఈ చిత్రంలో శ్రీలీల మరో కథానాయికగా నటిస్తుండగా, పార్తిబన్, గౌతమి వంటి హేమాహేమీలు ముఖ్య పాత్రలు పోషిస్తున్నారు. ఇప్పటికే విడుదలైన టీజర్లు, పోస్టర్లు సినిమాపై భారీ అంచనాలను పెంచగా, రాశీ ఖన్నా షేర్ చేసిన తాజా వీడియోలు సోషల్ మీడియాలో వైరల్ అవుతున్నాయి. యాక్షన్ తో పాటు వినోదానికి పెద్దపీట వేస్తున్న ఈ చిత్రం వచ్చే ఏడాది ప్రేక్షకుల ముందుకు వచ్చే అవకాశం ఉంది.
