టాలీవుడ్ యంగ్ హీరో కిరణ్ అబ్బవరం తన కెరీర్లో మరో సాహసోపేతమైన నిర్ణయం తీసుకున్నారు. హీరోగా తనకంటూ ప్రత్యేక గుర్తింపు తెచ్చుకున్న ఆయన.. ఇప్పుడు దర్శకుడిగానూ ప్రేక్షకుల ముందుకు రావడానికి సిద్ధమయ్యారు. కిరణ్ అబ్బవరం హీరోగా నటిస్తూ, స్వయంగా దర్శకత్వం వహిస్తున్న తన 13వ చిత్రం ‘KA13’ గ్రాండ్ పూజా కార్యక్రమాలతో అధికారికంగా ప్రారంభమైంది.
చిత్ర పరిశ్రమకు చెందిన పలువురు ప్రముఖుల సమక్షంలో జరిగిన ఈ ముహూర్తపు వేడుక అంగరంగ వైభవంగా జరిగింది. ముఖ్యంగా ఈ ఈవెంట్లో కిరణ్ అబ్బవరం ఇచ్చిన గ్రాండ్ ఎంట్రీ అందరి దృష్టిని ఆకర్షించింది. సరికొత్త లుక్తో, పూర్తి ఆత్మవిశ్వాసంతో వేడుకలో పాల్గొన్న ఆయన.. ఈ ప్రాజెక్ట్ తనకు ఎంత స్పెషల్ అనేది చెప్పకనే చెప్పేశారు. ప్రస్తుతం ఈ పూజా కార్యక్రమానికి సంబంధించిన ఫోటోలు, వీడియోలు సోషల్ మీడియాలో వైరల్ అవుతున్నాయి.
అయితే ఈ ప్రాజెక్ట్లో అందరి దృష్టిని ఆకర్షిస్తున్న ప్రధాన అంశం ఒక్కటే. అదే కిరణ్ అబ్బవరం డైరెక్టర్గా మారడం. హీరోగా మంచి ఫామ్లో ఉండగానే మెగా ఫోన్ పట్టడం అనేది చాలా అరుదుగా జరిగే విషయం. కానీ తనలోని మరో కోణాన్ని ప్రేక్షకులకు పరిచయం చేయాలనే ఉద్దేశంతో కిరణ్ ఈ సాహసోపేతమైన నిర్ణయం తీసుకున్నట్లు తెలుస్తోంది.
తానే స్వయంగా సిద్ధం చేసుకున్న ఒక డిఫరెంట్ అండ్ పవర్ఫుల్ కథతో ఈ సినిమాను తెరకెక్కించబోతున్నారట. కిరణ్ అబ్బవరం ఇమేజ్కు తగ్గట్టుగానే కాకుండా, కమర్షియల్ ఎలిమెంట్స్కు ఏమాత్రం లోటు లేకుండా ప్రేక్షకులను థ్రిల్ చేసే స్క్రిప్ట్ను ఆయన రెడీ చేసినట్లు టాలీవుడ్ వర్గాలు చెబుతున్నాయి. భారీ బడ్జెట్తో, అత్యున్నత నిర్మాణ విలువలతో ఈ చిత్రాన్ని రూపొందించనున్నట్లు సమాచారం.
‘రాజావారు రాణిగారు’, ‘ఎస్ఆర్ కళ్యాణమండపం’ చిత్రాలతో యూత్లో మంచి క్రేజ్ సంపాదించుకున్న కిరణ్ అబ్బవరం.. తర్వాత విభిన్నమైన కథలను ఎంచుకుంటూ తనకంటూ ప్రత్యేక గుర్తింపును తెచ్చుకున్నారు. ముఖ్యంగా ‘క’ సినిమాతో డిఫరెంట్ జోనర్లను కూడా విజయవంతంగా హ్యాండిల్ చేయగలనని నిరూపించారు.
ఇప్పుడు ‘KA13’తో దర్శకుడిగా కొత్త బాధ్యతలను భుజాన వేసుకుంటూ మరో సవాల్కు సిద్ధమయ్యారు. నటుడిగా ప్రేక్షకుల ప్రేమను పొందిన కిరణ్ అబ్బవరం.. దర్శకుడిగానూ అదే స్థాయిలో ఆకట్టుకుంటారా? ఈ సినిమా ఆయన కెరీర్కు మరో టర్నింగ్ పాయింట్గా మారుతుందా? అనే ఆసక్తి అభిమానుల్లో నెలకొంది.
మరి హీరోగా ఇప్పటికే తన మార్క్ చూపించిన కిరణ్ అబ్బవరం.. దర్శకుడిగా కూడా సక్సెస్ అందుకుని టాలీవుడ్లో కొత్త అధ్యాయాన్ని ప్రారంభిస్తారో లేదో చూడాలి. అయితే ఒక విషయం మాత్రం స్పష్టంగా కనిపిస్తోంది… ‘KA13’ ఇప్పుడు టాలీవుడ్లో మోస్ట్ ఇంట్రెస్టింగ్ ప్రాజెక్ట్స్లో ఒకటిగా మారిపోయింది.
