సూపర్ స్టార్ రజనీకాంత్ అభిమానులు ఎంతో ఆసక్తిగా ఎదురుచూస్తున్న అప్డేట్ ఎట్టకేలకు వచ్చేసింది. తలైవర్ 173వ సినిమాకు సంబంధించిన టైటిల్ను మేకర్స్ అధికారికంగా ప్రకటించారు. ఈ ప్రతిష్టాత్మక ప్రాజెక్ట్కు ‘ధర్మన్ – ది డెడ్లీ డాక్టర్’ అనే పవర్ఫుల్ టైటిల్ను ఖరారు చేస్తూ, చిత్రీకరణను కూడా ఘనంగా ప్రారంభించారు. టైటిల్ అనౌన్స్మెంట్తోనే సోషల్ మీడియాలో భారీ హైప్ నెలకొంది.
ఈ సినిమా ప్రత్యేకతల్లో ప్రధానమైనది ఇండియన్ సినిమా దిగ్గజాలు రజనీకాంత్, కమల్ హాసన్ మరోసారి ఒకే ప్రాజెక్ట్ కోసం కలిసి రావడం. ఈసారి తెరపై కాకపోయినా, కమల్ హాసన్ తన రాజ్ కమల్ ఫిల్మ్స్ ఇంటర్నేషనల్ బ్యానర్పై ఈ చిత్రాన్ని నిర్మిస్తున్నారు. రజనీకాంత్ హీరోగా, కమల్ నిర్మాతగా పనిచేస్తుండటంతో ఈ సినిమా చుట్టూ అంచనాలు మరింత పెరిగిపోయాయి.
ఇక టైటిల్తో పాటు విడుదల చేసిన ఫస్ట్ లుక్ పోస్టర్ ప్రస్తుతం అభిమానుల్లో సంచలనం సృష్టిస్తోంది. పోస్టర్లో రజనీకాంత్ ఓ పవర్ఫుల్ డాక్టర్ పాత్రలో కనిపిస్తుండగా, ఆయన లుక్ పూర్తిగా యాక్షన్ మోడ్లో ఆకట్టుకుంటోంది. ఒకవైపు వైద్యుడి పాత్ర, మరోవైపు డెడ్లీ యాక్షన్ అవతార్… ఈ రెండు ఎలిమెంట్స్ కలిసిన పాత్రలో తలైవర్ ఎలా అలరిస్తారో అనే ఆసక్తి ఇప్పుడు అందరిలో నెలకొంది.
ఈ చిత్రానికి దర్శకత్వం వహిస్తున్నది యువ దర్శకుడు అశ్వథ్ మారిముత్తు. ఇటీవల ‘డ్రాగన్’ సినిమాతో మంచి గుర్తింపు తెచ్చుకున్న ఆయన, ఇప్పుడు నేరుగా రజనీకాంత్ వంటి సూపర్ స్టార్తో సినిమా చేసే అరుదైన అవకాశాన్ని అందుకున్నారు. ఫస్ట్ లుక్తోనే అంచనాలను పెంచేసిన ఈ ప్రాజెక్ట్ నుంచి రాబోయే రోజుల్లో మరిన్ని ఆసక్తికరమైన అప్డేట్స్ వచ్చే అవకాశాలు కనిపిస్తున్నాయి.
మరి ‘ధర్మన్ – ది డెడ్లీ డాక్టర్’గా రజనీకాంత్ బాక్సాఫీస్ వద్ద ఎలాంటి సంచలనం సృష్టిస్తారో చూడాలి.
