తమిళనాడు రాజకీయాల్లోకి అడుగుపెట్టిన నటుడు విజయ్ కొత్త పార్టీ ‘తమిళగ వెట్రి కళగం’ (TVK) భవిష్యత్తుపై అన్నాడీఎంకే సీనియర్ నాయకుడు, మాజీ మంత్రి ఆర్బీ ఉదయకుమార్ కీలక వ్యాఖ్యలు చేశారు. మధురైలో మీడియాతో మాట్లాడిన ఆయన, ఆంధ్రప్రదేశ్లో మెగాస్టార్ చిరంజీవి రాజకీయంగా చేసిన పొరపాటును విజయ్ పునరావృతం చేయవద్దని హితవు పలికారు. జనసేన అధినేత పవన్ కల్యాణ్ తరహాలో సరైన సమయంలో పొత్తులపై నిర్ణయం తీసుకోవాలని ఆయన సూచించారు.
వచ్చే అసెంబ్లీ ఎన్నికల్లో అవినీతి డీఎంకే ప్రభుత్వాన్ని గద్దె దించడమే తమ కూటమి లక్ష్యమని ఉదయకుమార్ తెలిపారు. ఈ లక్ష్యంతోనే బీజేపీతో పొత్తు పెట్టుకున్నామని చెప్పారు. విజయ్ కూడా ఇదే సరైన సమయంలో తమ మెగా కూటమిలో చేరాలని ఆయన ఆహ్వానించారు. ఒకవేళ టీవీకే పార్టీ అన్నాడీఎంకే కూటమిలో చేరకపోతే, ఎన్నికల తర్వాత డీఎంకే ఆ పార్టీని నాశనం చేస్తుందని, తద్వారా టీవీకే రాజకీయంగా కనుమరుగవడం ఖాయమని ఉదయకుమార్ తీవ్రంగా హెచ్చరించారు. డీఎంకే మళ్లీ అధికారంలోకి వస్తే విజయ్ను దేవుడు కూడా కాపాడలేడని ఆయన వ్యాఖ్యానించారు.
ఈ సందర్భంగా ఆయన ఆంధ్రప్రదేశ్ రాజకీయ పరిణామాలను ఉదాహరణగా చూపారు. “ఆంధ్రప్రదేశ్లో చిరంజీవి పార్టీ పెట్టినప్పుడు పొత్తులపై సరైన నిర్ణయం తీసుకోలేకపోయారు. కానీ, పవన్ కల్యాణ్ సరైన సమయంలో సరైన పొత్తు నిర్ణయంతో పార్టీని నిలబెట్టుకోవడమే కాకుండా, ఇప్పుడు ఉప ముఖ్యమంత్రి అయ్యారు. ఈ కీలకమైన అంశాన్ని విజయ్ తప్పకుండా గుర్తుంచుకోవాలి” అని ఆయన సూచించారు. సరైన సమయంలో సరైన కూటమిలో చేరితేనే రాజకీయాల్లో మనుగడ సాధ్యమని విజయ్కు పవన్ కళ్యాణ్ ఉదాహరణతో ఉదయకుమార్ స్పష్టం చేశారు.
