‘బింబిసార’ సినిమాతో దర్శకుడిగా తనకంటూ ప్రత్యేక గుర్తింపు తెచ్చుకున్న వశిష్ఠ, ప్రస్తుతం మెగాస్టార్ చిరంజీవితో తెరకెక్కిస్తున్న ‘విశ్వంభర’ సినిమాతో బిజీగా ఉన్నాడు. భారీ బడ్జెట్తో సోషియో ఫాంటసీ కథాంశంగా రూపొందుతున్న ఈ సినిమాపై ఇప్పటికే ప్రేక్షకుల్లో భారీ అంచనాలు నెలకొన్నాయి. అయితే పలు కారణాలతో ఈ సినిమా విడుదల వాయిదా పడుతూ వస్తోంది. ఇప్పటికే షూటింగ్ పనులు పూర్తి చేసుకున్న ఈ చిత్రాన్ని త్వరలోనే ప్రేక్షకుల ముందుకు తీసుకురావాలని మేకర్స్ ప్రయత్నిస్తున్నారు.
అయితే ఇప్పుడు ‘విశ్వంభర’ సినిమా మరో ఆసక్తికరమైన విషయానికి కారణంగా మారింది. నందమూరి కుటుంబం నుంచి మరో వారసుడి సినీ ఎంట్రీ కూడా ఈ సినిమా కారణంగా ఆలస్యమవుతోంది. ఇంతకీ ఆ హీరో మరెవరో కాదు.. నందమూరి బాలకృష్ణ తనయుడు నందమూరి మోక్షజ్ఞ.
మోక్షజ్ఞను హీరోగా పరిచయం చేస్తూ ఓ భారీ చిత్రాన్ని తెరకెక్కించేందుకు దర్శకుడు వశిష్ఠ సిద్ధమవుతున్నాడు. ఈ ప్రాజెక్ట్ను మైత్రీ మూవీ మేకర్స్ నిర్మించనున్నట్లు ఇప్పటికే అధికారికంగా ప్రకటించారు. అయితే ముందుగా చిరంజీవి ‘విశ్వంభర’ విడుదలైన తర్వాతే మోక్షజ్ఞ సినిమాను ప్రారంభిస్తామని నిర్మాతలు స్పష్టం చేసినట్లు తెలుస్తోంది.
దీంతో ఇప్పుడు ‘విశ్వంభర’ విడుదల తేదీపై మెగా అభిమానులతో పాటు నందమూరి అభిమానుల్లోనూ ఆసక్తి పెరిగింది. ఒకవైపు మెగాస్టార్ సినిమాను ఎప్పుడెప్పుడు థియేటర్లలో చూస్తామా అని మెగా ఫ్యాన్స్ ఎదురుచూస్తుంటే, మరోవైపు ఈ సినిమా రిలీజ్ అయితేనే మోక్షజ్ఞ సినీ ఎంట్రీకి సంబంధించిన పనులు ముందుకు కదులుతాయని బాలయ్య అభిమానులు ఆశగా ఎదురుచూస్తున్నారు.
మొత్తానికి ‘విశ్వంభర’ విడుదలపై మెగా అభిమానులకే కాకుండా నందమూరి అభిమానులకు కూడా ప్రత్యేక ఆసక్తి ఏర్పడింది. మరి చిరంజీవి సినిమా ఎప్పుడు ప్రేక్షకుల ముందుకు వస్తుంది? మోక్షజ్ఞ హీరోగా ఎప్పుడు సెట్స్పైకి వెళ్తాడు? అనే ప్రశ్నలకు సమాధానం తెలియాలంటే మరికొంత కాలం వేచి చూడాల్సిందే.









