బాలీవుడ్‌లో అత్యంత ప్రతిష్టాత్మకంగా తెరకెక్కుతున్న భారీ చిత్రాల్లో ‘రామాయణం’ ఒకటి. రణ్‌బీర్ కపూర్, యష్, సాయి పల్లవి ప్రధాన పాత్రల్లో నటిస్తున్న ఈ సినిమాపై దేశవ్యాప్తంగా భారీ అంచనాలు నెలకొన్నాయి. ఇప్పటికే మొదటి భాగంపై ప్రేక్షకుల్లో మంచి ఆసక్తి ఏర్పడగా, ఇప్పుడు రెండో భాగానికి సంబంధించిన ఓ క్రేజీ అప్డేట్ బయటకు వచ్చింది.
‘రామాయణం: పార్ట్ 2’ షూటింగ్ ఇప్పటికే 60 శాతం పూర్తయినట్లు సినిమాటోగ్రాఫర్ పంకజ్ కుమార్ వెల్లడించారు. దీంతో ఈ సీక్వెల్ కోసం ఎదురుచూస్తున్న అభిమానుల్లో ఆసక్తి మరింత పెరిగింది. ముఖ్యంగా హనుమంతుడు, వానర సైన్యానికి సంబంధించిన సన్నివేశాలను అత్యంత భారీ స్థాయిలో తెరకెక్కించేందుకు చిత్రబృందం సిద్ధమవుతోంది. ఈ సన్నివేశాల కోసం అత్యాధునిక వీఎఫ్ఎక్స్ టెక్నాలజీతో పాటు మోషన్ క్యాప్చర్ విధానాన్ని కూడా ఉపయోగిస్తున్నట్లు తెలుస్తోంది.
దర్శకుడు నితీష్ తివారీ ఈ చిత్రాన్ని అంతర్జాతీయ స్థాయి ప్రమాణాలతో రూపొందించేందుకు ప్రత్యేక శ్రద్ధ తీసుకుంటున్నారు. ఇక ఈ సినిమాలో సన్నీ డియోల్ హనుమంతుడి పాత్రలో కనిపించనుండటం మరో ప్రత్యేక ఆకర్షణగా నిలుస్తోంది. ఇప్పటికే ఆయన పాత్రపై ప్రేక్షకుల్లో భారీ అంచనాలు ఉన్నాయి.
ప్రస్తుతం మిగిలిన షూటింగ్‌ను పూర్తి చేయడంతో పాటు పోస్ట్ ప్రొడక్షన్ పనులను కూడా పక్కా ప్రణాళికతో ముందుకు తీసుకెళ్లేందుకు మేకర్స్ ప్రయత్నిస్తున్నారు. మొత్తానికి 60 శాతం షూటింగ్ పూర్తయిందనే వార్తతో ‘రామాయణం పార్ట్ 2’పై అంచనాలు మరింత పెరిగాయి. మరి ఈసారి నితీష్ తివారీ ఎలాంటి విజువల్ వండర్‌ను ప్రేక్షకులకు చూపించబోతున్నారో చూడాలి.
