నితిన్ హీరోగా, వెంకీ కుడుముల దర్శకత్వంలో తెరకెక్కిన ‘రాబిన్‌హుడ్’ సినిమా బాక్సాఫీస్ వద్ద ఆశించిన విజయాన్ని అందుకోలేకపోయిన సంగతి తెలిసిందే. ‘భీష్మ’ వంటి సూపర్ హిట్ తర్వాత వీరిద్దరి కాంబినేషన్‌లో వచ్చిన సినిమా కావడంతో మొదట్లో భారీ అంచనాలు ఏర్పడ్డాయి. అయితే ఈ సినిమా ఫలితంపై తాజాగా ఓ ఇంటర్వ్యూలో మాట్లాడిన దర్శకుడు వెంకీ కుడుముల పలు ఆసక్తికర విషయాలను వెల్లడించారు.
ముఖ్యంగా ‘రాబిన్‌హుడ్’ సినిమా ఫ్లాప్ కావడానికి తాను తీసుకున్న కొన్ని నిర్ణయాలు కూడా కారణమని ఆయన అంగీకరించారు. సినిమా టైటిల్ వినగానే ప్రేక్షకులు ఒక కొత్త ప్రపంచాన్ని, భారీ యాక్షన్ ఎంటర్‌టైనర్‌ను ఊహించుకున్నారని, కానీ ఆ అంచనాలకు తగ్గట్టుగా కథను నడిపించలేకపోయామని తన అభిప్రాయాన్ని వెల్లడించారు.
‘భీష్మ’తో పోలిక వస్తుందనే భయం!
నితిన్‌తో ‘భీష్మ’ సినిమా చేసిన తర్వాత మరోసారి అదే తరహా కథతో వస్తే ప్రేక్షకులు పోలికలు పెడతారనే ఆలోచన తనలో ఉందని వెంకీ కుడుముల తెలిపారు. అందుకే ఈసారి భిన్నమైన కథను ఎంచుకోవాలని భావించారట. ఈ క్రమంలో గంజాయి ప్రపంచం, భారీ విలన్, ప్రపంచాన్ని కాపాడే హీరో వంటి అంశాలతో కథను మరింత పెద్ద స్థాయికి తీసుకెళ్లాలని ప్రయత్నించానని చెప్పారు. అయితే ఈ ఆలోచనలో అసలు కథకు దూరమయ్యానని తర్వాత గుర్తించినట్లు వెల్లడించారు.
ఫ్లాప్ బాధ్యత నాదే.. ఎవరినీ నిందించను!
సినిమా ఫలితం నిరాశపరిచినప్పటికీ హీరో నితిన్, నిర్మాతలు రవిశంకర్, నవీన్ యెర్నేని తనకు ఎంతో మద్దతుగా నిలిచారని వెంకీ తెలిపారు. సినిమా ఫెయిల్యూర్‌కు సంబంధించి ఎవరూ తనను నిందించలేదని, ఇబ్బంది పెట్టలేదని చెప్పారు. ఒక సినిమా హిట్ అయితే అది టీమ్ వర్క్ అని, ఫ్లాప్ అయితే మాత్రం ముందుగా తనలోని తప్పులను వెతుక్కుంటానని పేర్కొన్నారు.
తనలో సెల్ఫ్ క్రిటిసిజం ఎక్కువగా ఉంటుందని, అందుకే ఒక సినిమా పూర్తయిన తర్వాత మరో సినిమా ప్రారంభించడానికి కూడా కొంత సమయం తీసుకుంటానని వివరించారు.
నితిన్‌తో అనుబంధం అలాగే ఉంది!
‘రాబిన్‌హుడ్’ ఫలితం ఎలా ఉన్నప్పటికీ నితిన్‌తో తన అనుబంధంలో ఎలాంటి మార్పు రాలేదని వెంకీ కుడుముల స్పష్టం చేశారు. నితిన్ తనకు అన్నయ్య లాంటి వారని, ‘భీష్మ’తో తనపై నమ్మకం ఉంచిన ఆయనకు మరో విజయాన్ని అందించలేకపోయాననే బాధ మాత్రం తనలో ఉందని చెప్పుకొచ్చారు.
మొత్తానికి ‘రాబిన్‌హుడ్’ సినిమా ఫ్లాప్‌పై వెంకీ కుడుముల చేసిన ఈ వ్యాఖ్యలు ఇప్పుడు సోషల్ మీడియాలో వైరల్ అవుతున్నాయి. ముఖ్యంగా సినిమా పరాజయానికి తన నిర్ణయాలే కారణమని అంగీకరించడం, ఆ బాధ్యతను మరొకరిపై వేయకపోవడం సినీ వర్గాల్లో చర్చనీయాంశంగా మారింది.
