నందమూరి బాలకృష్ణ, స్టార్ డైరెక్టర్ కొరటాల శివ కాంబినేషన్‌లో ఓ భారీ ప్రాజెక్ట్ తెరకెక్కేందుకు సిద్ధమవుతోంది. ఈ సినిమాతో బాలయ్యను గతంలో ఎన్నడూ చూడని సరికొత్త మాస్ లుక్‌లో ప్రేక్షకుల ముందుకు తీసుకురావాలని కొరటాల ప్లాన్ చేస్తున్నారట. ముఖ్యంగా పొలిటికల్ బ్యాక్‌డ్రాప్, పవర్‌ఫుల్ యాక్షన్ సన్నివేశాలతో ఈ సినిమా ఉండబోతున్నట్లు సమాచారం.
ప్రస్తుతం బాలకృష్ణ, గోపీచంద్ మలినేని దర్శకత్వంలో రూపొందుతున్న ‘దాదా’ సినిమాతో బిజీగా ఉన్నారు. ఈ సినిమా పనులు పూర్తవుతున్న సమయంలోనే కొరటాల ప్రాజెక్ట్‌ను పట్టాలెక్కించేందుకు సన్నాహాలు జరుగుతున్నాయట. ఇప్పటికే ప్రీ ప్రొడక్షన్ పనులు వేగంగా సాగుతుండగా, వచ్చే నెల మొదటి వారం నుంచి రెగ్యులర్ షూటింగ్ ప్రారంభించేలా ప్లాన్ చేస్తున్నట్లు తెలుస్తోంది.
ఇక కొరటాల శివ సినిమాలంటే కేవలం యాక్షన్ మాత్రమే కాదు.. కథకు బలమైన నేపథ్యం కూడా ఉంటుంది. కథ జరిగే ప్రాంతం, అక్కడి ప్రజల జీవనశైలి, సామాజిక పరిస్థితులను తన సినిమాల్లో ప్రత్యేకంగా చూపించడం ఆయన స్టైల్. ఇప్పుడు బాలయ్య కోసం ఎలాంటి నేపథ్యాన్ని ఎంచుకున్నారన్నది ఆసక్తిని పెంచుతోంది.
మరోవైపు ఈ సినిమాలో ఫ్యామిలీ ఎమోషన్స్ కూడా కీలకంగా ఉండబోతున్నాయని టాక్. యాక్షన్, పొలిటికల్ అంశాలతో పాటు కుటుంబ ప్రేక్షకులను ఆకట్టుకునేలా కథను సిద్ధం చేస్తున్నారట. ‘దేవర’ తర్వాత కొరటాల శివ తెరకెక్కిస్తున్న సినిమా కావడంతో స్క్రిప్ట్ విషయంలో ఆయన ప్రత్యేక శ్రద్ధ తీసుకుంటున్నట్లు సమాచారం.
సుధాకర్ చెరుకూరి ఈ చిత్రాన్ని నిర్మించనున్నారు. మొత్తానికి బాలయ్య మాస్ ఇమేజ్‌కు కొరటాల మార్క్ కథ, కథనం తోడైతే ఈ కాంబినేషన్ ఎలాంటి సంచలనం సృష్టిస్తుందో చూడాలి.
