యూనివర్సల్ స్టార్ కమల్ హాసన్ మరోసారి తన కొత్త సినిమాతో సినీ వర్గాల్లో హాట్ టాపిక్‌గా మారారు. విలక్షణమైన కథలను ఎంచుకుంటూ తనకంటూ ప్రత్యేక గుర్తింపు తెచ్చుకున్న కమల్, ఈసారి దర్శకుడు ఎస్.యు. అరుణ్ కుమార్‌తో కలిసి ఓ ఆసక్తికరమైన ప్రాజెక్ట్ చేస్తున్నారు. కమల్ హాసన్ పుట్టినరోజు సందర్భంగా ఈ సినిమాకు సంబంధించిన టైటిల్‌తో పాటు ఫస్ట్ లుక్‌ను కూడా చిత్రబృందం విడుదల చేసింది.
ఈ చిత్రానికి ‘సందియార్’ అనే మాస్ టైటిల్‌ను ఖరారు చేశారు. విడుదలైన ఫస్ట్ లుక్ పోస్టర్‌లో కమల్ హాసన్ చేతిలో తుపాకీ పట్టుకుని, కారు పక్కన నిలబడిన తీరు ప్రత్యేక ఆకర్షణగా నిలిచింది. ఆయన లుక్‌లో కనిపిస్తున్న ఇంటెన్సిటీ, స్టైలిష్ యాక్షన్ అవతార్ అభిమానులను విశేషంగా ఆకట్టుకుంటున్నాయి. పోస్టర్ విడుదలైన కొద్దిసేపటికే సోషల్ మీడియాలో మంచి స్పందన లభిస్తోంది.
ఈ సినిమాను కమల్ హాసన్ సొంత నిర్మాణ సంస్థ రాజ్‌కమల్ ఫిల్మ్స్ ఇంటర్నేషనల్ ప్రతిష్టాత్మకంగా నిర్మిస్తోంది. ఇక రాక్‌స్టార్ అనిరుధ్ రవిచందర్ సంగీతం అందిస్తుండటంతో ఈ ప్రాజెక్ట్‌పై ఆసక్తి మరింత పెరిగింది. కమల్ హాసన్ ఇమేజ్‌కు తగ్గట్టుగా దర్శకుడు ఎలాంటి కథను సిద్ధం చేశారనే విషయం ఇప్పుడు చర్చనీయాంశంగా మారింది.
మరోవైపు ఇటీవల విడుదలైన ‘ఇండియన్ 2’, ‘థగ్ లైఫ్’ సినిమాలు కమల్ హాసన్‌కు ఆశించిన విజయాలను అందించలేకపోయాయి. దీంతో ‘సందియార్’ సినిమాపైనే అభిమానులు భారీ ఆశలు పెట్టుకున్నారు. ఈ చిత్రంతో కమల్ మరోసారి బాక్సాఫీస్ దగ్గర తన సత్తా చాటుతారని అంచనా వేస్తున్నారు. మరి ఈ కొత్త ప్రాజెక్ట్‌తో కమల్ హాసన్ ఎలాంటి మ్యాజిక్ చేస్తారో, దర్శకుడు అరుణ్ కుమార్ ఆయనను ఏ తరహా పాత్రలో చూపిస్తారో తెలియాలంటే మరికొంత కాలం వేచి చూడాల్సిందే.
