‘అర్జున్ రెడ్డి’ సినిమాతో టాలీవుడ్లో మంచి గుర్తింపు తెచ్చుకున్న హీరోయిన్ శాలిని పాండే.. ఆ తర్వాత బాలీవుడ్లోనూ వరుస అవకాశాలతో తనకంటూ ప్రత్యేక గుర్తింపు తెచ్చుకుంటున్నారు. అయితే తాజాగా ఆమె పేరు ఓ సైబర్ వివాదంలో వినిపించడం కలకలం రేపింది.
సోషల్ మీడియాలో శాలిని పాండేకు సంబంధించినదిగా చెబుతూ ఓ అభ్యంతరకరమైన వీడియో వైరల్గా మారింది. ఈ వీడియోపై కొంతకాలంగా మౌనంగా ఉన్న శాలిని పాండే తాజాగా స్పందించారు. వైరల్ అవుతున్న ఆ వీడియోతో తనకు ఎలాంటి సంబంధం లేదని, అది పూర్తిగా ఫేక్ కంటెంట్ అని ఆమె స్పష్టం చేశారు.
ఏఐ డీప్ఫేక్పై శాలిని పాండే ఆవేదన
తన ఇన్స్టాగ్రామ్ ద్వారా స్పందించిన శాలిని పాండే.. మహిళల ప్రతిష్టను దెబ్బతీసేందుకు ఏఐ టెక్నాలజీని దుర్వినియోగం చేయడం తీవ్రంగా ఆందోళన కలిగించే విషయమని పేర్కొన్నారు.
టెక్నాలజీ అభివృద్ధి చెందుతున్న సమయంలో దానిని మంచి పనులకు ఉపయోగించాల్సింది పోయి, వ్యక్తులపై తప్పుడు మరియు అభ్యంతరకరమైన కంటెంట్ రూపొందించడానికి ఉపయోగించడం ఏమాత్రం సమర్థనీయం కాదని ఆమె అన్నారు.
తన పేరుతో వైరల్ అవుతున్న వీడియో పూర్తిగా కల్పితమని, దాన్ని నిజమైనదిగా భావించవద్దని శాలిని పాండే స్పష్టం చేశారు.
అభిమానులకు కీలక విజ్ఞప్తి
అదే సమయంలో సోషల్ మీడియా వినియోగదారులు, అభిమానులకు కూడా శాలిని పాండే కీలక విజ్ఞప్తి చేశారు.
తనకు సంబంధించినదిగా ప్రచారం అవుతున్న ఫేక్ వీడియో ఎక్కడైనా కనిపిస్తే దాన్ని షేర్ చేయడం, డౌన్లోడ్ చేయడం లేదా దానిపై కామెంట్స్ చేయడం వంటివి చేయవద్దని కోరారు. బదులుగా వెంటనే సంబంధిత సోషల్ మీడియా ప్లాట్ఫామ్లో ఆ కంటెంట్ను రిపోర్ట్ చేయాలని సూచించారు.
డీప్ఫేక్ టెక్నాలజీ ద్వారా వ్యక్తుల ప్రతిష్టను దెబ్బతీసే కంటెంట్ను రూపొందించడం, ప్రచారం చేయడం తీవ్రమైన సమస్యగా మారుతున్న నేపథ్యంలో శాలిని పాండే స్పందన ఇప్పుడు చర్చనీయాంశంగా మారింది.
మొత్తానికి తనపై వైరల్ అవుతున్న వీడియో ఫేక్ అని శాలిని పాండే స్పష్టం చేయడంతో ఈ వివాదంపై ఆమె వైపు నుంచి క్లారిటీ వచ్చినట్లైంది.
