పెద్ద హీరోల సినిమాలు రెండేళ్లకోసారి మాత్రమే వస్తుండటంతో… ఇప్పుడు డిస్ట్రిబ్యూటర్లకు రీ-రిలీజ్లే పెద్ద ఆశ్రయంగా మారాయి. ఆశ్చర్యకరమైన విషయం ఏమిటంటే, ఒకప్పుడు బాక్సాఫీస్ను షేక్ చేసిన సినిమాలు మళ్లీ థియేటర్లలోకి వచ్చి మరోసారి కాసుల వర్షం కురిపిస్తున్నాయి. దీంతో స్టార్ హీరోల పుట్టినరోజులు, ప్రత్యేక సందర్భాలను టార్గెట్ చేస్తూ వరుసగా రీ-రిలీజ్లు ప్లాన్ చేస్తున్నారు.
ఇప్పుడు అదే జాబితాలో మరోసారి చేరింది సూపర్ స్టార్ మహేష్ బాబు నటించిన బ్లాక్బస్టర్ ‘దూకుడు’. మహేష్ బాబు పుట్టినరోజు సందర్భంగా ఆగస్టు 9న ఈ చిత్రం ఏకంగా నాలుగోసారి థియేటర్లలో రీ-రిలీజ్ కానుంది. అభిమానుల డిమాండ్ కారణమా, లేక రీ-రిలీజ్ల ట్రెండ్ను క్యాష్ చేసుకోవాలనే ఆలోచనా అనేది పక్కన పెడితే… ఒక సినిమాను నాలుగోసారి విడుదల చేయడం మాత్రం అరుదైన విషయమే.
అప్పటికే డీ, దుబాయ్ శ్రీను, రెడీ, కింగ్ వంటి వరుస విజయాలతో టాప్ ఫామ్లో ఉన్న దర్శకుడు శ్రీను వైట్ల, మరోవైపు అతిథి, ఖలేజా వంటి నిరాశల తర్వాత బలమైన హిట్ కోసం ఎదురుచూస్తున్న మహేష్ బాబు కాంబినేషన్లో ఈ సినిమా రూపొందింది. 2011 సెప్టెంబర్ 23న విడుదలైన దూకుడు, మహేష్ కెరీర్లోనే ఒక కీలక మలుపుగా నిలిచింది.
14 రీల్స్ ఎంటర్టైన్మెంట్స్ బ్యానర్పై రామ్ ఆచంట, గోపీచంద్ ఆచంట, అనిల్ సుంకర నిర్మించిన ఈ చిత్రం అప్పటి బాక్సాఫీస్ రికార్డులను తిరగరాసింది. ముఖ్యంగా శ్రీను వైట్ల ట్రేడ్మార్క్ కామెడీ, ఫాస్ట్ స్క్రీన్ప్లే, యాక్షన్ను సమపాళ్లలో మేళవించిన తీరు ప్రేక్షకులను విపరీతంగా ఆకట్టుకుంది.
రెండు షేడ్స్లో మెప్పించిన మహేష్
ఈ సినిమాలో ఒకవైపు పవర్ఫుల్ పోలీస్ ఆఫీసర్గా, మరోవైపు రాజకీయ నాయకుడి పాత్రలో మహేష్ బాబు చూపించిన వేరియేషన్స్ ప్రేక్షకులను అలరించాయి. యాక్షన్ సన్నివేశాలు థియేటర్లలో ఈలలు వేయించగా, సమంత తన ఎనర్జిటిక్ పెర్ఫార్మెన్స్తో యువతను ఆకట్టుకుంది.
ముఖ్యంగా కోమాలో ఉన్న తండ్రి కోసం హీరో ఆడే డ్రామా, బ్రహ్మానందంతో వచ్చే ‘పద్మశ్రీ’ కామెడీ ట్రాక్ ఈ సినిమాకు హైలైట్గా నిలిచింది. ఇప్పటికీ సోషల్ మీడియాలో వైరల్ అయ్యే ఎన్నో మీమ్స్ ఈ సినిమా నుంచే పుట్టాయంటే అతిశయోక్తి కాదు.
మహేష్, సమంతలతో పాటు ప్రకాశ్ రాజ్, సోనూ సూద్, బ్రహ్మానందం, ఎం.ఎస్. నారాయణ, వెన్నెల కిషోర్, ధర్మవరపు సుబ్రహ్మణ్యం తమ పాత్రలకు పూర్తి న్యాయం చేస్తూ సినిమాను మరో స్థాయికి తీసుకెళ్లారు.
ఇక సినిమాటోగ్రాఫర్ గుహన్ అందించిన విజువల్స్, ఎస్. థమన్ స్వరపరిచిన సంగీతం ఈ చిత్రానికి మరింత బలం చేకూర్చాయి. ముఖ్యంగా “గురు”, “పూవై పూవై”, “దేత్తడి” వంటి పాటలు, థమన్ అందించిన బ్యాక్గ్రౌండ్ స్కోర్ ఇప్పటికీ ప్రేక్షకులను అలరిస్తూనే ఉన్నాయి.
రికార్డులు సృష్టించిన దూకుడు
కలెక్షన్ల పరంగా కూడా దూకుడు తనదైన ముద్ర వేసింది. అప్పట్లోనే రూ.100 కోట్లకు పైగా గ్రాస్ వసూలు చేసి సౌత్ ఇండియన్ సినీ పరిశ్రమలో కొత్త రికార్డులు నమోదు చేసింది. అంతేకాదు, అమెరికాలో 1 మిలియన్ డాలర్ల మార్క్ను దాటిన తొలి తెలుగు చిత్రాల్లో ఒకటిగా నిలిచి తెలుగు సినిమా మార్కెట్ను మరింత విస్తరించింది.
చాలామంది సినీ విశ్లేషకుల అభిప్రాయం ప్రకారం, దూకుడు విజయంతోనే మహేష్ బాబు కెరీర్ మరో స్థాయికి చేరుకుంది. ఆ తర్వాత వచ్చిన బిజినెస్మ్యాన్, సీతమ్మ వాకిట్లో సిరిమల్లె చెట్టు, శ్రీమంతుడు, భరత్ అనే నేను, మహర్షి వంటి విజయాలకు ఈ సినిమా బలమైన పునాది వేసిందని చెప్పొచ్చు.
నాలుగోసారి కూడా అదే మ్యాజిక్ రిపీట్ అవుతుందా?
ఇప్పటికే ఎన్నో అవార్డులు అందుకున్న ఈ ఆల్టైమ్ ఎంటర్టైనర్ ఇప్పుడు 4K విజువల్ క్వాలిటీ, అప్గ్రేడ్ చేసిన సౌండ్ ఎక్స్పీరియెన్స్తో మరోసారి ప్రేక్షకుల ముందుకు రానుంది.
ఇప్పటికే మహేష్ బాబు పుట్టినరోజు సందర్భంగా విడుదలైన పోకిరి, ఒక్కడు, బిజినెస్మ్యాన్, మురారి వంటి రీ-రిలీజ్లు అద్భుతమైన వసూళ్లు సాధించాయి. ఇప్పుడు నాలుగోసారి థియేటర్లలోకి వస్తున్న దూకుడు కూడా అదే జోరు కొనసాగిస్తుందా? మరోసారి బాక్సాఫీస్ వద్ద తన దూకుడును చూపిస్తుందా? అన్నది ఆగస్టు 9న తేలనుంది.
అయితే ఒక విషయం మాత్రం ఖాయం… వింటేజ్ మహేష్ బాబును మరోసారి పెద్ద తెరపై చూడాలనుకునే అభిమానులకు ఇది నిజంగానే పండగలాంటి వార్త.
